നമീബിയയില് നിന്ന് മദ്ധ്യപ്രദേശിലെ കുനോ നാഷണല് പാര്ക്കിലേക്ക് കൊണ്ടുവന്ന 8 ചീറ്റകളും പുതിയ വിശാലമായ പ്രകൃതിയിൽ സാഹചര്യങ്ങളോടും വേട്ടയാടുന്നതിനോടും നന്നായി പൊരുത്തപ്പെട്ടതിന് പിന്നാലെ പാര്ക്കിലേക്ക് വീണ്ടും ചീറ്റകൾ എത്തുന്നു. ദക്ഷിണാഫ്രിക്കയില് നിന്ന് 12 ചീറ്റകളെക്കൂടി കൊണ്ടുവരാനുള്ള ഒരുക്കത്തിലാണ് കേന്ദ്രസര്ക്കാര്. പ്രൊജക്ട് ചീറ്റ പദ്ധതിയുടെ ഭാഗമായി കൂടുതല് ചീറ്റകളെ കുനോ നാഷണല് പാര്ക്കില് എത്തിക്കാന് ഇരു രാജ്യങ്ങളും ധാരണയിലെത്തി. നമീബിയന് ചീറ്റകളുടെ അതിജീവനം കണ്ടതിന് ശേഷം ദക്ഷിണാഫ്രിക്കയുടെ അനുകൂല നിലപാടും കാര്യങ്ങൾ എളുപ്പമാക്കി. കഴിഞ്ഞ ദിവസം ദക്ഷിണാഫ്രിക്കയിലെ വനം പരിസ്ഥിതി മന്ത്രി ബാര്ബറ ക്രീസി പദ്ധതി ചീറ്റയ്ക്കായി ഇന്ത്യയുമായുള്ള ധാരണാപത്രത്തിന് അംഗീകാരം നല്കി. ഇനി രാഷ്ട്രപതിയുടെ കൂടി അംഗീകാരം ലഭിക്കണം.
ചീറ്റകളെ നമീബിയയില് നിന്നും ദക്ഷിണാഫ്രിക്കയില് നിന്നും ഒരുമിച്ചു ഇന്ത്യയിലേക്ക് എത്തിക്കാനായിരുന്നു കേന്ദ്രസര്ക്കാരിന്റെ ആദ്യത്തെ ആലോചന. ചീറ്റകളെ തിരഞ്ഞെടുക്കുന്നത് മുതല് അവയെ ക്വാറന്റൈന് ചെയ്യുന്നതിനുള്ള തയ്യാറെടുപ്പുകള് നമീബിയയിലും ദക്ഷിണാഫ്രിക്കയിലും ഒരേ സമയം പൂര്ത്തിയാക്കിയെങ്കിലും ദക്ഷിണാഫ്രിക്കയില് നിന്ന് ചീറ്റകളെ കൊണ്ടുവരുന്നതിനുള്ള ധാരണാപത്രം ഒപ്പിടാനായില്ല. അതിനിടെ, നമീബിയയില് നിന്ന് വന്ന 8 ചീറ്റകള് ഇന്ത്യയിലേക്ക് എത്തുകയും ചെയ്തു. ദക്ഷിണാഫ്രിക്കയില് നിന്നുള്ള തിരഞ്ഞെടുത്ത 12 ചീറ്റകള് ക്വാറന്റൈന് എന്ക്ലോസറുകളില് അടച്ചിട്ടിരിക്കുകയാണ്. മൂന്നര മാസത്തോളമായി ക്വാറന്റൈന് എന്ക്ലോസറുകളില് നിരീക്ഷണത്തിലാണ് ചീറ്റകള്.