കോഴിക്കോട് : സംസ്ഥാന സ്കൂള് കലോത്സവത്തില് സ്വര്ണ്ണകപ്പിനായുള്ള നിര്ണ്ണായക പോരില് കണ്ണൂരിനെ പിന്തള്ളി ആതിഥേയരായ കോഴിക്കോട് മുന്നില്. 808 പോയിന്റുമായി കോഴിക്കോട് കണ്ണൂരിനെ മറികടന്നു. 802 പോയിന്റുമായി കണ്ണൂര് തൊട്ടുപിന്നിലുണ്ട്. പാലക്കാട് മൂന്നാമതാണ്. അവസാന ദിനമായ നാളെ 11 മത്സരങ്ങളാണുള്ളത്. ചാംപ്യന് പട്ടത്തിനായുള്ള സ്കൂളുകളുടെ പോരാട്ടത്തില് തിരുവനന്തപുരം കാര്മല് ഗേള്സ് സ്കൂളിനെ പിന്തള്ളി ആലത്തൂർ ഗുരുകുലം സ്കൂള് കുതിപ്പ് തുടരുകയാണ്. കലോത്സവത്തിന്റെ ആദ്യദിനം മുതല് ചാംപ്യന്സ് സ്കൂള് പട്ടത്തിനായി കുതിപ്പ് തുടര്ന്ന തിരുവനന്തപുരം കാര്മല് ഗേള്സ് സ്കൂളിന് വെല്ലുവിളി ഉയര്ത്തി മുന് ചാംപ്യന്മാരായ ആലത്തൂര് ഗുരുകുലം ഹയര് സെക്കന്ററി സ്കൂള് മുന്നിലെത്തി. തുടര്ച്ചയായ 10ാം കിരീടമെന്ന സ്വപ്നവുമായാണ് ഗുരുകുലത്തിൻറെ അവസാന ദിവസങ്ങളിലെ മുന്നേറ്റം.
കലോത്സവത്തിൽ കോടതി അപ്പീലുകളുമായി എത്തിയ 78 മത്സരങ്ങളുടെ ഫലം തടഞ്ഞു വച്ചിരിക്കുകയാണ്. ഇതാദ്യമായാണ് കോടതി അപ്പീലുമയി വരുന്നവരുടെ മത്സരഫലം തടയുന്നത്. ഹൈക്കോടതി നിർദേശപ്രകാരമാണ് തീരുമാനമെന്ന് സംഘാടകർ പറഞ്ഞു. ഇനി കോടതി ഇടപെടലുണ്ടായി ഫലം പ്രഖ്യാപിച്ചാലും ഓവർ ഓൾ പോയന്റിൽ ഉൾപ്പെടില്ല.