ആലപ്പുഴ: ആഭ്യന്തര സെക്രട്ടറി ഡോ. വേണു ഐ എ എസും കുടുംബവും സഞ്ചരിച്ചിരുന്ന കാർ അപകടത്തിൽപ്പെട്ടു. ഇന്നലെ രാത്രി 12 30 യോടെ കായംകുളം കൊറ്റംകുളങ്ങര ദേശീയപാതയിലായിരുന്നു അപകടം നടന്നത്. ഇന്നോവകാർ ലോറിയുമായി കൂട്ടിയിടിക്കുകയായിരുന്നു. അപകടത്തിൽ കുടുംബാംഗങ്ങളുൾപ്പെടെ ഏഴുപേർക്ക് പരിക്കേറ്റിട്ടുണ്ട്. ഇതില്‍ ചിലരുടെ പരിക്ക് ഗുരുതരമാണെന്ന് പ്രാഥമിക വിവരം. കൊച്ചി ബിനാലെ കഴിഞ്ഞ് തിരുവനന്തപുരത്തേക്ക് മടങ്ങിപോകുമ്പോഴാണ് അപകടം നടന്നത്.
കൊച്ചിയിൽനിന്നും തിരികെ തിരുവനന്തപുരത്തേക്ക് മടങ്ങവേ കൊറ്റംകുളങ്ങരയ്ക്ക് സമീപം എറണാകുളം ഭാഗത്തേക്ക് അരിയുമായി പോവുകയായിരുന്ന ലോറിയുമായി കാർ കൂട്ടിയിടിക്കുകയായിരുന്നു. വേണു,ഭാര്യ ശാരദ , മകൻ ശബരി, ഡ്രൈവർ അഭിലാഷ്, കുടുംബ സുഹൃത്തുക്കളായ പ്രണവ്, സൗരവ് എന്നിവർക്കാണ് അപകടത്തിൽ പരിക്കേറ്റിട്ടുള്ളത്. അപകടത്തിൽ സാരമായി പരിക്കേറ്റ വേണുവിനെ തിരുവല്ല ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്. മൂക്കിനും വയറിനും പരിക്കേറ്റിട്ടുണ്ട്. ആന്തരിക രക്തസ്രാവം ഉള്ളതായി ആശുപത്രി വൃത്തങ്ങൾ അറിയിച്ചു. അപകടത്തിൽ കാറിന്റെ മുൻവശം പൂർണമായും തകർന്നു.