ഷാർജ എമിറേറ്റിൽ സ്വദേശികളും വിദേശികളും ഉൾപ്പെടെയുള്ള താമസക്കാർ സംതൃപ്തരാണെന്ന് പഠന റിപ്പോർട്ട്. ഷാർജയിലെ ഗുരുതരമായ കുറ്റകൃത്യങ്ങളുടെ നിരക്കിൽ ഗണ്യമായ കുറവുണ്ടെന്നും റിപ്പോർട്ട് പറയുന്നു. എമിറേറ്റിലെ 99.8 ശതമാനം പേരും എമിറേറ്റ് സുരക്ഷിതമാണെന്ന് വിലയിരുത്തി. സുരക്ഷ ഉറപ്പാക്കാനായി ഷാർജ പൊലീസ് 89,772 ഹൈടെക് നിരീക്ഷണ ക്യാമറകൾ എമിറേറ്റിൽ സ്ഥാപിച്ചുകഴിഞ്ഞു. ‘സുരക്ഷിതവും സുസ്ഥിരവുമായ ഭാവിയിലേയ്ക്ക് ഒരുമിച്ച്’ എന്ന വിഷയത്തിൽ ഷാർജ ഡെസേർട്ട് പോലീസ് ക്യാംപില്‍ നടന്ന എട്ടാമത് വാ‍ർഷിക മീഡിയ ഫോറത്തില്‍ ആണ് പോലീസ് മേധാവികൾ ഇക്കാര്യങ്ങൾ വ്യക്തമാക്കിയത്.
ഷാർജ ഡിപ്പാർട്ട്‌മെൻ്റ് ഓഫ് സ്റ്റാറ്റിസ്റ്റിക്‌സ് ആൻഡ് കമ്മ്യൂണിറ്റി ഡെവലപ്‌മെൻ്റ് നടത്തിയ പഠനറിപ്പോർട്ട് ഷാർജ പോലീസ് പുറത്തുവിട്ടു. ജനങ്ങളുടെ സുരക്ഷക്കായുള്ള പ്രവർത്തങ്ങളിൽ 99.3 ശതമാനം ആളുകളും വിശ്വാസം പ്രകടിപ്പിച്ചു. ഷാർജയിലെ ഗുരുതരമായ കുറ്റകൃത്യങ്ങളുടെ നിരക്ക് കഴിഞ്ഞ വർഷം ഗണ്യമായി കുറഞ്ഞുവെന്നും കൃത്യമായ ഡാറ്റയോടെ പൊതുജനങ്ങളുടെ ആവശ്യങ്ങൾ നിറവേറ്റുന്നതിനായുള്ള ശ്രമങ്ങൾ കൂടുതൽ ഫലപ്രദമായി നയിക്കാനാകുമെന്നും ഷാർജ പോലീസ് കമാൻഡർ-ഇൻ-ചീഫ് മേജർ ജനറൽ സെയ്ഫ് അൽ സരി അൽ ഷംസി പറഞ്ഞു
എമിറേറ്റിലുടനീളം കൂടുതൽ റഡാറുകൾ സ്ഥാപിച്ചിട്ടുണ്ടെന്ന് ഷാർജ ട്രാഫിക് പോലീസ് ഡയറക്ടർ കേണൽ മുഹമ്മദ് അലയ് അൽ നഖ്ബി പറഞ്ഞു. അപകടസാധ്യതയുള്ള പ്രദേശങ്ങളിൽ വിന്യസിച്ചിരിക്കുന്ന റഡാറുകൾ 9 ശതമാനം വർധിപ്പിച്ചതിന്‍റെ ഫലമായി ട്രാഫിക് അപകടങ്ങളിലും മരണങ്ങളിലും ഗണ്യമായ കുറവുണ്ടായിട്ടുണ്ട്. ട്രാഫിക് പിഴകളിൽ ശാശ്വതമായ 35 ശതമാനം കിഴിവ് ഗണ്യമായി സഹായിച്ചിട്ടുണ്ടെന്നും ഇത് പിഴകൾ തീർപ്പാക്കാനും വാഹന ലൈസൻസ് പുതുക്കാനും ആളുകളെ പ്രേരിപ്പിച്ചതിനാൽ പിഴകൾ തീർപ്പാക്കിയ ശേഷം 242,000 വാഹന ലൈസൻസുകൾ പുതുക്കി നൽകുമെന്നും അദ്ദേഹം പറഞ്ഞു. എമിറേറ്റില്‍ വർഷം മുഴുവനും നീണ്ടുനില്‍ക്കുന്ന സുരക്ഷാ പട്രോളിംഗുകള്‍ മൂലം റോഡപകടങ്ങള്‍ മൂലമുണ്ടാകുന്ന മരണങ്ങൾ കുറഞ്ഞുവെന്നും മരണങ്ങളുടെ എണ്ണത്തില്‍ 16 ശതമാനം കുറവുണ്ടായതായും കണക്കുകൾ വ്യക്തമാക്കുന്നു. ഷാർജ പൊലീസിന്‍റെ പ്രതികരണ സമയം 2022-ലെ 4.58 മിനിറ്റിനെ അപേക്ഷിച്ച് 2023-ൽ 3.39 മിനിറ്റാണ് എടുത്തത്. കൺട്രോൾറൂം 901 നോൺ എമർജൻസി നമ്പറിൽ 20,35,859 കോളുകളും 999 നമ്പരിൽ 4,21,370 കോളുകളും ലഭിച്ചിരുന്നു.
ലഹരിമരുന്ന് നിയന്ത്രണം മികച്ചരീതിയിൽ നടപ്പാക്കാൻ സാധിച്ചു. 2023ൽ ലഹരിമരുന്നുകൾ പിടിച്ചെടുക്കൽ 24.3 ശതമാനമായി ഉയർന്നു. 2023ൽ 1.12 ദശലക്ഷം ഗ്രാം മയക്കുമരുന്നുകളും 4.55 ദശലക്ഷം സൈക്കഡെലിക് ഗുളികകളും പിടിച്ചെടുത്തു. 115.37 ദശലക്ഷം ദിർഹം വിലമതിക്കുന്നവയാണിത്. ലഹരിമരുന്ന് പ്രചരിപ്പിക്കാൻ ഉപയോഗിക്കുന്ന 1,003 വെബ്‌സൈറ്റുകൾ ഷാർജ പൊലീസ് ബ്ലോക്ക് ചെയ്യുകയും ലഹരിമരുന്ന് കടത്താനുള്ള 600,029 ശ്രമങ്ങൾ പരാജയപ്പെടുത്തുകയും ചെയ്തു.
2023-ൽ ഷാർജ പൊലീസിന് പ്രാദേശിക, രാജ്യാന്തര തലങ്ങളിൽ എട്ട് അവാർഡുകൾ ലഭിച്ചു. കസ്റ്റമർ ഹാപ്പിനസ് കേന്ദ്രം 2023-ൽ നൽകിയ സേവനങ്ങളിൽ 94 ശതമാനം പേരും സന്തുഷ്ടരാണെന്നും ഷാർജ പൊലീസ് വ്യക്തമാക്കി. ഇടപാടുകൾ ഡിജിറ്റലാക്കി. ഡിജിറ്റൽ ചാനലുകളുടെ ഉപയോഗം 96 ശതമാനമാണ്. കാത്തിരിപ്പ് സമയം ഒരു മിനിറ്റിൽ താഴെയാണ്. ഇതെല്ലം സംതൃപ്തി നിരക്ക് കൈവരിക്കുന്നതിന് കാരണമായി.
ഷാർജ പോലീസിന്‍റെ 2024-27 വ‍ർഷങ്ങളിലേക്കുളള നയവും പ്രഖ്യാപിച്ചു. പ്രധാനമായും ആറ് ലക്ഷ്യങ്ങളാണ് ഷാർജ പൊലീസ് ജനറൽ ഹെഡ്ക്വാർട്ടേഴ്‌സ് സ്ട്രാറ്റജി 2024-27 എന്നതിൽ ഉൾപ്പെടുന്നത്. സമൂഹത്തില്‍ കൂടുതല്‍ സുരക്ഷ ഉറപ്പാക്കുക, ട്രാഫിക് സുരക്ഷ വർധിപ്പിക്കുക, പ്രതിസന്ധിക്കും ദുരന്തനിവാരണത്തിനുമുള്ള സന്നദ്ധത വർധിപ്പിക്കുക, ഉപയോക്തൃ അനുഭവം മെച്ചപ്പെടുത്തുക സമൂഹത്തിന്‍റെ പങ്കാളിത്തം ഉറപ്പാക്കുക, തുടങ്ങിയ ആറ് തന്ത്രപരമായ ലക്ഷ്യങ്ങൾക്ക് ആണ്ഷാർജ പോലീസ് കമാൻഡർ-ഇൻ-ചീഫ് മേജർ ജനറൽ സെയ്ഫ് അൽ സരി അൽ ഷംസിതുടക്കമിട്ടത്.