മുണ്ടത്തിക്കോട് വെടിക്കെട്ടുപുര സ്ഫോടനത്തിൽ മരിച്ചവരുടെ കുടുംബാംഗങ്ങള്ക്ക് 14 ലക്ഷം രൂപ വീതം ധനസഹായം സർക്കാർ തീരുമാനിച്ചു. കേരള മുഖ്യമന്ത്രിയുടെ ദുരിതാശ്വാസനിധിയിൽ നിന്ന് 10 ലക്ഷയും സംസ്ഥാന ദുരന്ത പ്രതികരണ നിധി (എസ്ഡിആർഎഫ്) നിന്ന് 4 ലക്ഷം രൂപയും നൽകാനാണ് മന്ത്രിസഭാ യോഗം തീരുമാനിച്ചത്. അപകടത്തെ സംസ്ഥാനത്തെ സവിശേഷ ദുരന്തമായി പ്രഖ്യാപിക്കും. പരിക്കേറ്റവരുടെ ചികിത്സ സൗജന്യമായിരിക്കും. ആറു മാസത്തിൽ കൂടുതൽ കാലം ചികിത്സ വേണ്ടവർക്ക് സിഎംഡിആർഎഫിൽ നിന്നും തുക അനുവദിക്കും. പരിക്കേറ്റവര്ക്ക് ദുരന്തപ്രതികരണ നിധി പ്രകാരം അനുവദനീയമായ തുകയും, അതിനു പുറമേ മുഖ്യമന്ത്രിയുടെ ദുരിതാശ്വാസനിധിയില് നിന്നും 2 ലക്ഷം രൂപ അടിയന്തര ധനസഹായമായി അനുവദിക്കും.
പരിക്കേറ്റവര്ക്ക് ആറ് മാസത്തേക്കുള്ള സര്ക്കാര്/സ്വകാര്യ ആശുപത്രികളിലെ ചികിത്സാചെലവ് സര്ക്കാര് ഏറ്റെടുക്കും. ഇതിനാവശ്യമായ തുക ജില്ലാ കളക്ടറുടെ ശുപാർശയുടെ അടിസ്ഥാനത്തില് മുഖ്യമന്ത്രിയുടെ ദുരിതാശ്വാസ നിധിയില് നിന്നും അനുവദിക്കാവുന്നതാണ്. ഇതിനു പുറമേ, ദുരന്ത പ്രതികരണ നിധിയില് നിന്നും അനുവദിനീയമായ തുക ചികിത്സാ ധനസഹായമായി നല്കും. ആറുമാസത്തിലധികമായി ചികിത്സ വേണ്ടിവന്നാല് മെഡിക്കല് ബോര്ഡിന്റെ തീരുമാനത്തിന്റെ അടിസ്ഥാനത്തില് ശുപാർശ ചെയ്യപ്പെട്ട സ്വകാര്യ ആശുപത്രികളില് ചികിത്സാ ചെലവ് മുഖ്യമന്ത്രിയുടെ ദുരിതാശ്വാസ നിധിയില് നിന്നും അനുവദിക്കും. സുരക്ഷാ ആവശ്യങ്ങള്ക്കായി പ്രദേശത്തെ സ്വകാര്യ വ്യക്തികളുടെ വയലുകളുള്പ്പെടെയുള്ള സ്ഥലങ്ങള് നികത്തിയത് പൂര്വസ്ഥിയിലാക്കും. തിരച്ചിലും രക്ഷാപ്രവര്ത്തനവും സുഗമമാക്കുന്നതിനുവേണ്ടി പ്രദേശത്തെ സ്വകാര്യ വ്യക്തികളുടെ മതില് പൊളിക്കുകയും വയല് നികത്തുകയും ചെയ്തിട്ടുണ്ട്. അവ പൂര്വ്വ സ്ഥിതിയില് ആക്കുന്നതിന് ചെലവാകുന്ന യഥാര്ത്ഥ തുക ജില്ലാ കളക്ടറുടെ ശുപാർശയുടെ അടിസ്ഥാനത്തില് ദുരന്തപ്രതികരണ നിധിയില് നിന്നും അനുവദിക്കും.
ദുരന്തവുമായി ബന്ധപ്പെട്ട് മൃതദേഹങ്ങള് മറവു ചെയ്യുന്നതിനും, ഡി എന് എ മാച്ചിംഗിനായി സാമ്പിളുകള് ശേഖരിക്കുന്നതിനുമായി സ്റ്റാന്ഡേര്ഡ് ഓപ്പറേറ്റിംഗ് പ്രൊസീജ്യര് (SOP) പുറപ്പെടുവിക്കുന്നതിന് ആവശ്യമായ നിര്ദ്ദേശം സംസ്ഥാന ദുരന്ത നിവാരണ അതോറിറ്റിയുടെ സ്റ്റേറ്റ് എക്സിക്യൂട്ടിവ് കമ്മിറ്റിക്ക് നല്കി. അടിയന്തര പ്രതികരണത്തിനായി 50 ലക്ഷം രൂപ ദുരന്ത പ്രതികരണ നിധിയില് നിന്നും കഴിഞ്ഞ അനുവദിച്ച നടപടി സാധൂകരിച്ചു. ദുരന്ത പ്രതികരണവുമായി ബന്ധപ്പെട്ട് ഉണ്ടായിട്ടുള്ള ചെലവുകള് ഈ തുകയില് നിന്നും ചെലവഴിക്കാന് ജില്ലാ കലക്ടര്ക്ക് നിർദ്ദേശം നൽകി.