കൊച്ചി: ലൈഫ് മിഷൻ കോഴ കേസുമായി ബന്ധപ്പെട്ട് ഇ ഡി, മുഖ്യമന്ത്രിയുടെ മുൻ പ്രൈവറ്റ് സെക്രട്ടറി എം ശിവശങ്കരനെ ചോദ്യം ചെയ്യും. ചൊവ്വാഴ്ച കൊച്ചിയിൽ ചോദ്യം ചെയ്യലിന് ഹാജരാവാൻ ശിവശങ്കരന് നോട്ടീസ് നൽകി. ചൊവ്വാഴ്ച താൻ വിരമിക്കുന്ന ദിവസമാണെന്ന് ചൂണ്ടിക്കാണിച്ച് ചോദ്യം ചെയ്യൽ സമയം മാറ്റിവയ്ക്കണമെന്ന് ശിവശങ്കർ ആവശ്യപ്പെട്ടതായാണ് അറിയാൻ കഴിയുന്നത്. കള്ളപ്പണം ഇടപാട് കേസിൽ നേരത്തെ സ്വപ്ന സുരേഷിന്റെയും സരിത്തിന്റെയും യൂണിടക് ഉടമ സന്തോഷ് ഈപ്പന്റെയും മൊഴി ഇ ഡി രേഖപ്പെടുത്തിയിരുന്നു. ഇതിനുശേഷമാണ് ശിവശങ്കരന് നോട്ടീസ് നൽകുന്നത്.
ലോക്കറിൽ നിന്നും പിടിച്ചെടുത്ത പണവുമായി ബന്ധപ്പെട്ട കാര്യങ്ങൾ ശിവശങ്കറിൽ നിന്നും ഇ ഡി ചോദിച്ചറിയും എന്നാണ് സൂചന. യൂണിടാക്കിന് ലൈഫ് മിഷൻ കിട്ടാൻ ശിവശങ്കരന്റെ ഇടപെടൽ ഉണ്ടായി എന്നാണ് സ്വപ്ന ഉൾപ്പെടെയുള്ളവർ മൊഴി നൽകിയിരിക്കുന്നത്. ഇക്കാര്യത്തെക്കുറിച്ചും ഇ ഡി യുടെ ചോദ്യം ഉണ്ടാവും.