രാഹുല് ഗാന്ധിക്കും പ്രിയങ്ക ഗാന്ധിക്കുമെതിരെ സി.പി.എം പൊളിറ്റ് ബ്യൂറോ അംഗം എ.വിജയരാഘവന് നടത്തിയ വിവാദ പരാമര്ശത്തില് പിന്തുണയുമായി സി.പി.എം നേതാക്കൾ രംഗത്ത്. സംസ്ഥാന സെക്രട്ടറി എം.വി.ഗോവിന്ദന്, പോളിറ്റ് ബ്യൂറോ അംഗം സുഭാഷിണി അലി, കേന്ദ്ര കമ്മിറ്റിയംഗം പി.കെ ശ്രീമതി എന്നിവരാണ് പ്രതികരണവുമായി രംഗത്തെത്തിയത്. എ. വിജയരാഘവൻ്റെ പരാമർശത്തെ ന്യായീകരിച്ച് കേന്ദ്ര കമ്മിറ്റി അംഗം പി.കെ ശ്രീമതി. പാർട്ടി നിലപാടാണ് വിജയരാഘവൻ പറഞ്ഞതെന്ന് ശ്രീമതി തിരുവനന്തപുരത്ത് മാധ്യമങ്ങളോട് പറഞ്ഞു. ‘വിജയരാഘവന് അങ്ങിനെ തെറ്റായി പറഞ്ഞതായി തോന്നിയില്ല. ഞാന് അവിടെ ഉണ്ടായിരുന്നു. കേരളത്തിലും വര്ഗീയവാദികളും തീവ്രവാദികളും തല ഉയര്ത്താന് ശ്രമിക്കുന്നുണ്ട്. അത്തരം പ്രവര്ത്തനങ്ങള് കേരളത്തില് നടപ്പാക്കാന് അനുവദിക്കില്ല. അത് ആരായാലും. ഹിന്ദു വര്ഗീയവാദികളായാലും മുസ്ലിം വര്ഗീയവാദികളായാലും അതിന് എതിരായ നിലപാടാണ് സി.പി.എം സ്വീകരിക്കുകയെന്നും ശ്രീമതി പറഞ്ഞു.
എ. വിജയരാഘവനെ പരോക്ഷമായി പിന്തുണച്ച് സി.പി.എം പോളിറ്റ്ബ്യൂറോ അംഗം സുഭാഷിണി അലിയും രംഗത്തെത്തി. വയനാട്ടില് ആദ്യം രാഹുല് ഗാന്ധിയും പിന്നീട് പ്രിയങ്കയും ജയിച്ചത് ലീഗിൻ്റെയും അവരെ പിന്തുണയ്ക്കുന്നവരുടേയും സഹായം കൊണ്ടാണെന്നും ഏത് സാഹചര്യത്തിലാണ് വിജയരാഘവൻ്റെ പ്രസ്താവനയെന്ന് അറിയില്ലെന്നും സുഭാഷിണി അലി പ്രതികരിച്ചു. “വിവാദ പരാമര്ശത്തിൻ്റെ വിശദാംശങ്ങള് കൂടുതല് അറിയാന് അദ്ദേഹത്തോട് ചോദിക്കണം. മുസ്ലിം സംഘടനകളില് പല വിഭാഗങ്ങളുണ്ട്. ജ്യേഷ്ഠനും അനുജനും രാഷ്ട്രീയത്തിൻ്റെ പേരില് മിണ്ടാതെയും രണ്ട് ധ്രുവങ്ങളില് നില്ക്കുന്നവരുണ്ട്.” സുഭാഷിണി അലി പറഞ്ഞു.
ജമാഅത്തെ ഇസ്ലാമിക്കെതിരെ നടത്തുന്ന പാരാമര്ശങ്ങള് മുസ്ലിങ്ങള്ക്കും ആര്.എസ്.എസിനെതിരെ നടത്തുന്ന വിമര്ശനങ്ങള് ഹിന്ദുക്കള്ക്കും എതിരല്ലെന്ന് എം വി ഗോവിന്ദൻ പറഞ്ഞു. മുസ്ലിം വര്ഗീയവാദത്തിൻ്റെ പ്രധാനികളാണ് ജമാഅത്തെ ഇസ്ലാമിയെന്നും അദ്ദേഹം വിമര്ശിച്ചു. മുസ്ലിം വര്ഗീയവാദത്തിൻ്റെ പ്രധാനികളാണ് ജമാഅത്തെ ഇസ്ലാമിയെന്നും എം വി ഗോവിന്ദൻ പറഞ്ഞു.
വിവാദ പരാമര്ശത്തില് വിജയരാഘവനെ പൂര്ണമായും പിന്തുണയ്ക്കുന്ന നിലപാടാണ് സി.പി.എം. സ്വീകരിക്കുന്നത് എന്ന സൂചനയാണ് പാര്ട്ടി സെക്രട്ടറി നല്കുന്നത്. ലോക്സഭാ തിരഞ്ഞെടുപ്പില് രാഹുല് ഗാന്ധി വയനാട്ടില്നിന്ന് വിജയിച്ചത് മുസ്ലീം വര്ഗീയ ചേരിയുടെ പിന്തുണയോടെയാണെന്നായിരുന്നു എ.വിജയരാഘവന്റെ ആരോപണം. പ്രിയങ്കയുടെ ഘോഷയാത്രയിലും ന്യൂനപക്ഷ വര്ഗീയതയിലെ മോശപ്പെട്ട ഘടകങ്ങളുണ്ടായിരുന്നുവെന്നും അദ്ദേഹം ആരോപിച്ചിരുന്നു. സി.പി.എം വയനാട് ജില്ലാ സമ്മേളനത്തിന്റെ പ്രതിനിധി സമ്മേളനത്തിലാണ് അദ്ദേഹം ഈ വിമര്ശനങ്ങള് ഉന്നയിച്ചത്.
ഹിന്ദു വര്ഗീയവാദത്തിൻ്റെ സുപ്രധാന കരുത്തായ ആര്.എസ്.എസ്. പോലെ മുസ്ലിം വര്ഗിയവാദത്തിന്റെ ഏറ്റവും പ്രധാന വിഭാഗമായി ജമാഅത്തെ ഇസ്ലാമിയും, ഭീകരവാദ പ്രസ്ഥാനത്തിന്റെ ഭാഗമായ എസ്.ഡി.പി.ഐയും നില്ക്കുകയാണ്. ഇവരുടെ സഖ്യകക്ഷിയാണ് ഇപ്പോള് കോണ്ഗ്രസ് പ്രവര്ത്തിക്കുന്നത്. കഴിഞ്ഞ പാര്ലമെന്റ് തെരഞ്ഞെടുപ്പിലും പാലക്കാട് ഉപതെരഞ്ഞെടുപ്പിലും ഒരു സഖ്യകക്ഷിയെപോലെയാണ് യു.ഡി.എഫും ജമാഅത്തെ ഇസ്ലാമിയും പ്രവര്ത്തിച്ചതെന്നും എം വി ഗോവിന്ദൻ പറഞ്ഞു. എസ്.ഡി.പി.ഐ, ജമാഅത്തെ ഇസ്ലാമി എന്നിവരെ ചേര്ത്ത് നിര്ത്തുന്നതിൻ്റെ പ്രത്യാഘാതങ്ങള് വൈകാതെ തന്നെ കോണ്ഗ്രസിന് ലഭിക്കുമെന്നും അദ്ദേഹം മുന്നറിയിപ്പ് നല്കി.