പശ്ചിമ ബംഗാളിൽ അടുത്തിടെ യുഎസിൽ നിന്ന് മടങ്ങിയെത്തിയ നാല് പേരുടെ ജീനോം സീക്വൻസിംഗിൽ കൊറോണ വൈറസിന്റെ പുതിയ വകഭേദം ബിഎഫ്.7 ബാധിച്ചതായി സ്ഥിരീകരിച്ചു. നാല് പേരുടെയും ആരോഗ്യനില തൃപ്തികരമാണെന്ന് ആരോഗ്യ വകുപ്പ് ഉദ്യോഗസ്ഥർ പറഞ്ഞു. രോഗബാധിതരായ ഈ നാല് പേരുമായി ആകെ 33 പേർ സമ്പർക്കം പുലർത്തിയതായി സംസ്ഥാന ആരോഗ്യവകുപ്പ് കണ്ടെത്തി. 33 പേരും നിലവിൽ ആരോഗ്യവാന്മാരാണ്, അവരുടെ അവസ്ഥ സംസ്ഥാന ആരോഗ്യവകുപ്പ് നിരീക്ഷിച്ചു വരികയാണ്
കഴിഞ്ഞ ആഴ്ച കൊൽക്കത്ത വിമാനത്താവളത്തിൽ ഒരു വിദേശ പൗരൻ ഉൾപ്പെടെ രണ്ട് പേർക്ക് കോവിഡ് പോസിറ്റീവ് ആണെന്ന് സ്ഥിരീകരിച്ചതിന് പിന്നാലെ അവരുടെ ജീനോം സീക്വൻസിംഗ് പരിശോധന നടത്തിയപ്പോൾ ഒമൈക്രോണിന്റെ BF.7 സബ്വേരിയന്റ് ബാധിച്ചതായി സ്ഥിരീകരിച്ചിരുന്നു.. കഴിഞ്ഞ മാസം മുതൽ വിദേശത്ത് നിന്ന് കൊൽക്കത്ത വിമാനത്താവളത്തിൽ എത്തിയ കോവിഡ് ബാധിതരുടെ എല്ലാവരുടെയും സാമ്പിളുകൾ ജീനോം സീക്വൻസിംഗിനായി ശേഖരിച്ചു വരികയാണ്.