പാക്കിസ്ഥാനില് ദേശീയ അസംബ്ലി പിരിച്ചുവിട്ടതോടെ രാഷ്ട്രീയ പ്രതിസന്ധി തുടരുകയാണ്. ഇടക്കാല പ്രധാനമന്ത്രിയായി അന്വര് ഉള് ഹഖ് കാക്കറിനെ തിരഞ്ഞെടുത്തതായി ദേശീയ അസംബ്ലിയിലെ പ്രതിപക്ഷ നേതാവ് രാജ റിയാസ് അറിയിച്ചു. ബലൂചിസ്ഥാന് അവാമി പാര്ട്ടിയുമായി (ബിഎപി) ബന്ധമുള്ള സെനറ്റര് അന്വര്-ഉല്-ഹഖ് കാക്കര് ഈ വര്ഷാവസാനം പുതിയ തിരഞ്ഞെടുപ്പ് നടക്കുന്നത് വരെ കാവല് സര്ക്കാരിനെ നയിക്കും. സ്ഥാനമൊഴിയുന്ന പ്രധാനമന്ത്രി ഷെഹ്ബാസ് ഷെരീഫും രാജാ റിയാസും രണ്ട് റൗണ്ട് കൂടിയാലോചനകള് നടത്തിയ ശേഷമാണ് തീരുമാനമെടുത്തത്.
ഓഗസ്റ്റ് 9 ന് ആണ് ദേശീയ അസംബ്ലി പിരിച്ചുവിടാന് പ്രധാനമന്ത്രി ഷെഹ്ബാസ് ഷെരീഫ് ശുപാര്ശ ചെയ്തത്.ഇത്തരമൊരു സാഹചര്യത്തില് ഭരണഘടനയനുസരിച്ച് 90 ദിവസത്തിനുള്ളില് അടുത്ത പൊതുതിരഞ്ഞെടുപ്പ് നടക്കും. പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവന പ്രകാരം ഷെഹ്ബാസ് ഷെരീഫും രാജാ റിയാസും അന്വര് ഉള് ഹഖ് കാക്കറിനെ കാവല് പ്രധാനമന്ത്രിയായി നിയമിക്കുന്നത് സംബന്ധിച്ച് പ്രസിഡന്റ് അല്വിക്ക് നിര്ദേശം അയച്ചിട്ടുണ്ട്. നേരത്തെ പ്രധാനമന്ത്രിയുടെ വസതിക്ക് പുറത്ത് വെച്ച് റിയാസ് ഇക്കാര്യം സ്ഥിരീകരിച്ചിരുന്നു.
ഓഗസ്റ്റ് 12-നകം ഇടക്കാല പ്രധാനമന്ത്രിയുടെ പേര് നിര്ദ്ദേശിക്കാന് രാഷ്ട്രപതി തന്നോടും പ്രതിപക്ഷ നേതാവിനോടും (രാജ റിയാസ്) നിര്ദ്ദേശിച്ചെന്നാണ് ഷഹബാസ് ഷെരീഫ് പറഞ്ഞത്. ആര്ട്ടിക്കിള് 224 എ പ്രകാരം ദേശീയ അസംബ്ലി പിരിച്ചുവിട്ട് മൂന്ന് ദിവസത്തിനകം ഇടക്കാല പ്രധാനമന്ത്രിയുടെ പേര് നിര്ദ്ദേശിക്കണമെന്ന് പ്രസിഡന്റ് ആരിഫ് അല്വി അയച്ച കത്തില് അറിയിച്ചിരുന്നു. അതേസമയം പാക് പാര്ലമെന്റിന്റെ അധോസഭയായ ദേശീയ അസംബ്ലി പിരിച്ചുവിട്ട് കാവല് പ്രധാനമന്ത്രിയെ നിയമിക്കുന്നതിന് ഭരണഘടനയില് എട്ട് ദിവസത്തെ സമയമുണ്ടെന്നായിരുന്നു ഷെരീഫ് പ്രതികരിച്ചത്.