കൊച്ചി: സിനിമ പ്രൊഡക്ഷൻ ഡിസൈനറും കലാസംവിധായകനുമായ സുനിൽ ബാബു അന്തരിച്ചു. ഹൃദയാഘാതത്തെ തുടർന്ന് വ്യാഴാഴ്ച രാത്രി എറണാകുളം അമൃത ആശുപത്രിയിൽ വച്ചായിരുന്നു അന്ത്യം. പത്തനംതിട്ട മല്ലപ്പള്ളി സ്വദേശിയാണ് സുനിൽ. മലയാളം, തെലുങ്ക്, ബോളിവുഡ് സിനിമകളിലെ കലാസംവിധായകനായി പ്രവർത്തിച്ചുവരികയായിരുന്നു. കാലിലുണ്ടായ നീരിനെ തുടർന്നു മൂന്നുദിവസം മുമ്പാണ് സുനിലിനെ ആശുപത്രിയിൽ പ്രവേശിപ്പിച്ചത്. മല്ലപ്പള്ളി കുന്നന്താനം രാമമംഗലം തങ്കപ്പൻ നായരുടെയും സരസ്വതി അമ്മയുടെയും മകനാണ്.
മൈസൂർ ആർട്സ് കോളേജിലെ പഠനത്തിന് ശേഷമാണ് സംവിധായകൻ സാബു സിറിലിന്റെ സഹായിയായി സുനിൽ ബാബു ചലച്ചിത്രരംഗത്ത് എത്തിയത്. മലയാളത്തിൽ അനന്തഭദ്രം, ചോട്ടാമുംബൈ, ആമി, പഴശ്ശിരാജ, ബാംഗ്ലൂർ ഡേയ്സ്, പ്രേമം, കായംകുളം കൊച്ചുണ്ണി, ഉറുമി തുടങ്ങിയവയാണ് അദ്ദേഹം കലാസംവിധാനം നിർവഹിച്ച ശ്രദ്ധേയമായ ചിത്രങ്ങൾ. അനന്തഭദ്രത്തിലെ കലാസംവിധാനത്തിന് മികച്ച കലാ സംവിധായകനുള്ള സംസ്ഥാന ചലച്ചിത്ര അവാർഡ് ലഭിച്ചിട്ടുണ്ട്. ബോളിവുഡിൽ ഗജനി, ലക്ഷ്യ, സ്പെഷ്യൽ ചൗബീസ് എന്നീ ചിത്രങ്ങളിൽ പ്രവർത്തിച്ചിട്ടുണ്ട്. വിജയ് നായകനായി എത്തുന്ന വാരിസിലാണ് ഏറ്റവും ഒടുവിൽ പ്രവർത്തിച്ചത്. ഈ ചിത്രം റിലീസ് ആകാൻ ഇരിക്കവെയാണ് മരണം. മൃതദേഹം അമൃത ആശുപത്രിയിൽ സൂക്ഷിച്ചിരിക്കുകയാണ്. ഭാര്യ പ്രേമ മകൾ ആര്യ സരസ്വതി.