നോയിഡ: ഇന്ത്യൻ നിർമ്മിത കഫ് സിറപ്പ് കുടിച്ച് 18 കുട്ടികൾ മരിച്ചതായി ഉസ്ബെക്കിസ്ഥാൻ. മരുന്ന് നിർമിക്കുന്ന നോയിഡ ആസ്ഥാനമായി പ്രവർത്തിക്കുന്ന മാരിയൻ ബയോടെക് കമ്പനിക്കെതിരെ രാജ്യം പരാതി നൽകിയതായാണ് വിവരം പുറത്തുവരുന്നത്. മരുന്നിൽ കഫ് സിറപ്പിൽ ഉണ്ടാകാൻ പാടില്ലാത്ത എഥിലീൻ ഗ്ലൈക്കോൾ എന്ന അപകടകരമായ പദാർത്ഥം കണ്ടെത്തിയതായും ആരോഗ്യമന്ത്രാലയം അറിയിച്ചു. ഇക്കഴിഞ്ഞ ഒക്ടോബറിൽ ഗാംബിയ മറ്റൊരു ഇന്ത്യൻനിർമ്മിത മരുന്ന് കമ്പനിക്കെതിരെ ആരോപണം ഉന്നയിച്ചിരുന്നു. ഇതിന് തൊട്ടുപിന്നാലെയാണ് സമാനമായ പരാതി ഉയർന്നിരിക്കുന്നത്. സംഭവത്തിൽ ലോകാരോഗ്യസംഘടന കേസെടുത്തു അന്വേഷണം തുടങ്ങിയിട്ടുണ്ട്.
ബയോടെക് കമ്പനി നിർമ്മിച്ച ഡോക് -1വൺ മാക്സ് എന്ന മരുന്ന് അമിതഅളവിൽ ഉപയോഗിച്ച 21 കുട്ടികളിൽ 18 പേർ മരിച്ചതായാണ് റിപ്പോർട്ട്. ഗുരുതരമായ ശ്വാസകോശരോഗങ്ങൾ ബാധിച്ച കുട്ടികളാണ് മരണമടഞ്ഞതിന്നു ആരോഗ്യമന്ത്രാലയം അറിയിച്ചു .മരിച്ച കുട്ടികൾ എല്ലാം ആശുപത്രിയിൽ എത്തുന്നതിനു മുൻപ് തന്നെ വീട്ടിൽ വച്ച് മരുന്നു കഴിച്ചവരാണ്. ഒരു ദിവസം മൂന്നു മുതൽ നാല് തവണ വരെ 2.5 ടു 5 മില്ലി എന്ന നിരക്കിൽ രണ്ടു മുതൽ ഏഴു ദിവസം വരെ സിറപ്പ് കഴിച്ചവരാണ് മരിച്ചതെന്നാണ് വ്യക്തമാകുന്നത്. ഇത് അമിതഡോസ് ആണെന്ന് ആരോഗ്യ മന്ത്രാലയം വ്യക്തമാക്കി. എല്ലാ കുട്ടികളും ഡോക്ടറുടെ കുറുപ്പടി ഇല്ലാതെയാണ് മരുന്നു കഴിച്ചത് എന്നാണ് അറിയാൻ കഴിയുന്നത്.
കഴിഞ്ഞ ഒക്ടോബറിൽ ഗാംബിയ യിൽ അഞ്ചു വയസ്സിൽ താഴെയുള്ള 66 കുട്ടികളുടെ മരണത്തിന് പിന്നിൽ ഇന്ത്യൻ നിർമ്മിത കഫ് സിറപ്പാണെന്ന ആരോപണം ഉയർന്നിരുന്നു. ഹരിയാനയിലെ മെയ്ഡൻ ഫാർമസ്യൂട്ടിക്കൽ കമ്പനിയുടെ കഫ് സിറപ്പിൽ അപകടകരമായ ഡയറ്റ്തലിൻ ഗ്ലൈക്കോൾ, എഥിലിൻ ഗ്ലൈക്കോൾ എന്നിവ ഉയർന്ന അളവിൽ കണ്ടെത്തിയിരുന്നു. മരുന്ന് കുട്ടികളുടെ വൃക്കകളെ ബാധിച്ചാണ് മരണം നടന്നതെന്നും കണ്ടെത്തിയിട്ടുണ്ട് . നാലു മരുന്നുകളാണ് അപകടകാരികൾ ആയതെന്ന് കണ്ടെത്തി. പീഡിയാട്രിക് വിഭാഗത്തിൽ ഉപയോഗിക്കുന്ന പ്രോ മെത്താസിൻ ഓറൽ സൊല്യൂഷൻ, കോഫെക്സാമാലിൻ ബേബി കഫ് സിറപ്പ്, മകോഫ് ബേബി കഫ് സിറപ്പ്, മഗ്രിപ് എൻ കോൾഡ് സിറപ്പ് എന്നിവയാണ് അപകടകാരികളായത് . ആരോപണം ഉയർന്നതിന് പിന്നാലെ ഫാർമസികൾ കമ്പനി പൂട്ടിയിട്ടുണ്ട്. ഡിസംബർ രണ്ടാംവാരം മരുന്ന് സാമ്പിളുകൾ സർക്കാർ ലബോറട്ടറിയിൽ പരിശോധിച്ചതിൽ നിന്നും തെറ്റായി ഒന്നും കണ്ടെത്താത്ത സാഹചര്യത്തിൽ കമ്പനി തുറക്കാൻ അനുമതി ആവശ്യപ്പെട്ട് മെയ്ഡൻ ഫാർമസ്യുട്ടിക്കൽ ലിമിറ്റഡ് സർക്കാറിനെ സമീപിച്ചിട്ടുണ്ട്.