ദുബായ് ഗവൺമെന്റിന് ഇനി മുതൽ പുതിയ ലോഗോ. കഴിഞ്ഞ ദിവസം ചേർന്ന എക്‌സിക്യൂട്ടീവ് കൗൺസിൽ യോഗത്തിൽ ദുബായ് കിരീടാവകാശിയും എക്‌സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പുതിയ ലോഗോക്ക് അംഗീകാരം നൽകി. ദുബായിലെ സർക്കാർ സ്ഥാപനങ്ങളിൽ ഉടനീളം പുതിയ ലോഗോ ഉടൻ നടപ്പാക്കാനും അദ്ദേഹം നിർദ്ദേശിച്ചു.
എമിറേറ്റിന്റെ ദർശനങ്ങളോട് ചേർന്ന് നിൽക്കുന്നതാണ് പുതിയ ലോഗോ. വികസന യാത്ര, ഭാവിയുടെ നഗരമായുള്ള ദുബായുടെ പരിണാമം എന്നിവയുടെ പ്രതീകമാണ് പുതിയ ലോഗോ എന്ന് അദ്ദേഹം പറഞ്ഞു. ദേശീയ പക്ഷിയായ ഫാൽക്കൺ, യു.എ.ഇയുടെ പരമ്പരാഗത ബോട്ട് , ഈന്തപ്പന, ഗാഫ് ഇലകൾ എന്നിങ്ങനെ അടയാളങ്ങളാണ് ലോഗോയിലുള്ളത്.