ഷാരൂഖ് ഖാൻ നായകനായി എത്തുന്ന പുതിയ ചിത്രമാണ് പഠാൻ. യഷ് രാജ് ബാനറിൽ ഒരുങ്ങുന്ന ചിത്രത്തിന്റെ സംവിധാനവും തിരക്കഥയും ചെയ്തിരിക്കുന്നത് സിദ്ധാർഥ് ആനന്ദ് ആണ്. ദീപിക പദുക്കോൺ ആണ് ചിത്രത്തിൽ നായികയായി എത്തുന്നത്. നാലുവർഷത്തിനുശേഷം ഷാരൂഖ് ഖാൻ വെള്ളിത്തിരയിലേക്ക് എത്തുന്നത് ഈ ചിത്രത്തിലൂടെയാണ് എന്നൊരു പ്രത്യേകത കൂടി പഠാനുണ്ട്. ഷാരൂഖ് ഖാന്റെ ഏറ്റവും വലിയ പ്രോജക്ടുകളിൽ ഒന്നാണ് പഠാൻ . ഷാരൂഖിന് പുറമേ ജോൺ എബ്രഹാമും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. ഡിംപിൾ കപാടിയ, ഷാജി ചൗധരി, ഗൗതം, ആഷുതോഷ് റാണ തുടങ്ങി ഒട്ടേറെ താരങ്ങൾ ചിത്രത്തിൽ അണിനിരക്കുന്നുണ്ട്. സത്ചിത് പൗലോസ് ആണ് ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത്.
ഡിസംബർ 12ന് ദീപിക പദുക്കോണും ഷാരൂഖ് ഖാനും പ്രത്യക്ഷപ്പെട്ട ബേഷരം രംഗ് എന്ന ഗാനം പുറത്തിറങ്ങിയതോടെയാണ് ചിത്രം വിവാദത്തിലേക്ക് എത്തിയത്. ചിത്രം റിലീസ് തടയണമെന്നതടക്കമുള്ള ധാരാളം വിവാദങ്ങൾ ചിത്രത്തെ പിന്തുടർന്നു. ചിത്രത്തിന്റെ പ്രദർശനത്തിനും ഭീഷണി ഉണ്ടായതിനെ തുടർന്ന് ഗുജറാത്തിലെ മൾട്ടിപ്ലക്സ് അസോസിയേഷൻ സംസ്ഥാന ആഭ്യന്തരമന്ത്രി ഹർഷ് സംഘവിയോട് തിയേറ്റർ ഹാളുകളുടെ സുരക്ഷ ആവശ്യപ്പെട്ടിരുന്നു. പഠാനിലൂടെ കിങ് ഖാന്റെ വരവിനായി കാത്തിരിക്കുകയാണ് ആരാധകർ. ചിത്രത്തിന്റെ ഡിജിറ്റൽ റൈറ്റ്സ് ആമസോൺ പ്രൈം വീഡിയോയാണ് സ്വന്തമാക്കിയിരിക്കുന്നത്.