വാഷിങ്ടണ്: യു.എസിന്റെ ഇറാന് ഉപരോധം തുടങ്ങിയതിന് പിന്നാലെ ഇരുരാജ്യങ്ങളും തമ്മില് രണ്ടാംവട്ട ചര്ച്ചകള്ക്കുള്ള നീക്കം നടക്കുന്നു. വ്യാഴാഴ്ച ഇരു രാജ്യങ്ങളും തമ്മില് രണ്ടാംവട്ട ചര്ച്ച നടക്കുമെന്നാണ് അസോസിയേറ്റ് പ്രസ് റിപ്പോര്ട്ട് ചെയ്യുന്നത്. ഇസ്ലാമാബാദില് ഇരു രാജ്യങ്ങളും തമ്മില് കഴിഞ്ഞയാഴ്ച ചര്ച്ച നടത്തിയിരുന്നു. എന്നാല്, ചര്ച്ചകളില് തീരുമാനമായിരുന്നില്ല. ഇതിന് പിന്നാലെയാണ് ഇരുരാജ്യങ്ങളും തമ്മില് വീണ്ടും ചര്ച്ചകള്ക്കുള്ള നീക്കം നടക്കുന്നത്. ഇറാന്-യു.എസ് ബന്ധം ഏറ്റവും മോശമായി സാഹചര്യത്തിലാണ് വീണ്ടും ചര്ച്ച നടക്കുന്നതെന്നത് ശ്രദ്ധേയമാണ്.
അതേസമയം, ഇറാന്േറത് സാമ്പത്തിക തീവ്രവാദമാണെന്ന് യു.എസ് വൈസ് പ്രസിഡന്റ് ജെ.ഡി വാന്സ് പറഞ്ഞു.. ഹോര്മുസ് അടക്കുന്നതിലൂടെ സാമ്പത്തിക തീവ്രവാദമാണ് ഇറാന് നടപ്പിലാക്കുന്നതെന്ന് ഫോക്സ് ന്യൂസ് അവതാരകന് ബ്രെറ്റ് ബെയ്റുമായി സംസാരിക്കുമ്പോള് വാന്സ് പറഞ്ഞു. ഇത്തരം നടപടികള്ക്ക് മറുപടി നല്കാതെ പോവില്ലെന്നും അദ്ദേഹം കൂട്ടിച്ചേര്ത്തു. ഇറാന് കൂടുതല് പ്രകോപനങ്ങളുമായി മുന്നോട്ട് പോവുകയാണെങ്കില് കടുത്ത നടപടികള് യു.എസിന്റെ ഭാഗത്ത് നിന്നും ഉണ്ടാവുമെന്നും അദ്ദേഹം പറഞ്ഞു. ഇറാന് നടപടികള്ക്കനുസരിച്ചാവും ഇനിയുള്ള യു.എസിന്റെ പ്രതികരണമെന്നും അദ്ദേഹം പറഞ്ഞു. പന്ത് ഇനി ഇറാന്റെ കോര്ട്ടിലാണ്. ഞങ്ങളുടെ ചുവന്ന വരകള് വ്യക്തമാക്കി കഴിഞ്ഞു. ഇറാന്റെ യുറേനിയത്തിനുമേല് യു.എസ് നിയന്ത്രണം, ആണവായുധം നിര്മിക്കുന്നില്ലെന്ന് ഉറപ്പാക്കാന് സംവിധാനം എന്നിവയാണ് തങ്ങള് ആവശ്യപ്പെടുന്നതെന്നും വാന്സ് പറഞ്ഞു.
ഹോര്മുസില് ഇടപെടാന് യു.എസ് പ്രസിഡന്റ് ഡോണള്ഡ് ട്രംപ് ശ്രമിച്ചാല് പരാജയപ്പെടുമെന്ന് ഇറാന്. പ്രതിരോധമന്ത്രാലയം വക്താവാണ് ഇക്കാര്യം അറിയിച്ചത്. ഹോര്മുസ് ഉപരോധിക്കാന് ട്രംപിന് ശേഷിയില്ല. പടക്കപ്പലുകളുമായി ആക്രമിക്കാന് വന്നാല് അവ മുക്കുമെന്നും ഇറാന് പ്രതിരോധമന്ത്രാലയം വക്താവ് അറിയിച്ചതായി റോയിട്ടേഴ്സ് റിപ്പോര്ട്ട് ചെയ്തു.