പശ്ചിമേഷ്യയിൽ ഇറാൻ-അമേരിക്ക-ഇസ്രായേൽ സംഘർഷം വഷളായതോടെ ആഗോള വിപണിയിൽ എണ്ണവില തുടർച്ചയായ മൂന്നാം ദിവസവും കുതിച്ചുയരുന്നു. ലോകത്തെ പ്രധാന എണ്ണ ഉല്പാദന മേഖലകളിൽ നിന്നുള്ള വിതരണം തടസ്സപ്പെടുമെന്ന ആശങ്ക നിക്ഷേപകരെ സ്വാധീനിച്ചതോടെ ചൊവ്വാഴ്ച വ്യാപാരത്തിന്റെ തുടക്കത്തിൽ തന്നെ വിലയിൽ വൻ വർദ്ധനവ് രേഖപ്പെടുത്തി.
ചൊവ്വാഴ്ച രാവിലെ ബ്രെന്റ് ക്രൂഡ് ഫ്യൂച്ചറുകൾ 2.2 ശതമാനം വർദ്ധിച്ച് ബാരലിന് 79.44 ഡോളറിലെത്തി. തിങ്കളാഴ്ച ഇത് 82.37 ഡോളർ വരെ ഉയർന്നിരുന്നു, ഇത് 2025 ജനുവരിക്ക് ശേഷമുള്ള ഏറ്റവും ഉയർന്ന നിരക്കാണ്. യുഎസ് വെസ്റ്റ് ടെക്സസ് ഇന്റർമീഡിയറ്റ് (WTI) വില 1.6 ശതമാനം വർദ്ധിച്ച് 72.40 ഡോളറിലെത്തി. മേഖലയിലെ സംഘർഷം ഉടൻ അവസാനിക്കാനുള്ള ലക്ഷണങ്ങൾ കാണാത്തതിനാൽ വരും ദിവസങ്ങളിലും വില ഉയരാൻ തന്നെയാണ് സാധ്യതയെന്ന് വിപണി വിദഗ്ധർ വിലയിരുത്തുന്നു.
ലോകത്തെ എണ്ണ-വാതക വിതരണത്തിന്റെ 20 ശതമാനവും കടന്നുപോകുന്ന ഹോർമുസ് കടലിടുക്ക് പ്രായോഗികമായി അടഞ്ഞുകിടക്കുന്നത് വിപണിയെ പിടിച്ചുലച്ചിരിക്കുകയാണ്. ഈ പാതയിലൂടെ സഞ്ചരിക്കുന്ന ഏത് കപ്പലിനും നേരെ വെടിവെക്കുമെന്ന് ഇറാനിയൻ റെവല്യൂഷണറി ഗാർഡ്സ് മുന്നറിയിപ്പ് നൽകിയിട്ടുണ്ട്. ഇൻഷുറൻസ് കമ്പനികൾ ഈ മേഖലയിലെ കപ്പലുകൾക്കുള്ള പരിരക്ഷ റദ്ദാക്കിയതോടെ ടാങ്കറുകൾ ഈ വഴി ഒഴിവാക്കിത്തുടങ്ങി. ഇത് കപ്പൽ ഗതാഗത നിരക്കുകൾ കുത്തനെ ഉയരാൻ കാരണമായി.
എണ്ണ വിതരണ ശൃംഖലയെ മാത്രമല്ല, മേഖലയിലെ ഊർജ്ജ ഇൻഫ്രാസ്ട്രക്ചറിനെയും യുദ്ധം ബാധിച്ചിട്ടുണ്ട്. സൗദി അറേബ്യയിലെ ഏറ്റവും വലിയ എണ്ണ ശുദ്ധീകരണ ശാല ഡ്രോൺ ആക്രമണത്തെത്തുടർന്ന് തിങ്കളാഴ്ച പ്രവർത്തനം നിർത്തിവെച്ചു. ഇത് ഡീസൽ, ഗ്യാസോലിൻ എന്നിവയുടെ വില ആഗോളതലത്തിൽ ഉയരുന്നതിന് കാരണമായി. യൂറോപ്യൻ ഗ്യാസോയിൽ ഫ്യൂച്ചറുകളിൽ തിങ്കളാഴ്ച മാത്രം 18 ശതമാനത്തിന്റെ വർദ്ധനവാണുണ്ടായത്.
യുദ്ധം നീണ്ടുനിൽക്കുകയാണെങ്കിൽ ബ്രെന്റ് ക്രൂഡ് വില ബാരലിന് 120 മുതൽ 150 ഡോളർ വരെ ഉയർന്നേക്കാമെന്ന് ബേൺസ്റ്റൈൻ റിപ്പോർട്ട് ചെയ്യുന്നു. 2026-ലെ ശരാശരി എണ്ണവില 80 ഡോളറായിരിക്കുമെന്നാണ് അവരുടെ പുതിയ നിഗമനം. സാംകോ സെക്യൂരിറ്റീസിലെ മാർക്കറ്റ് പെർസ്പെക്റ്റീവ്സ് ആൻഡ് റിസർച്ച് ഹെഡ് അപൂർവ ഷെത്ത് പറയുന്നതനുസരിച്ച്, വിപണിയിൽ ഇപ്പോൾ പ്രകടമാകുന്നത് ഭൗമരാഷ്ട്രീയ സാഹചര്യങ്ങൾ മൂലമുള്ള പെട്ടെന്നുള്ള വർദ്ധനവാണ്.