ദുബായ്: യുഎഇയിലെ പ്രമുഖ ഡിജിറ്റൽ സ്വർണ്ണ നിക്ഷേപ പ്ലാറ്റ്ഫോമായ ഒ ഗോൾഡ് മദ്ധ്യ പൂർവദേശത്തെ ആദ്യ ശരിഅത്ത് സ്വർണാധിഷ്ഠിത പ്രീപെയ്ഡ് കാർഡ് പുറത്തിറക്കുന്നു. യുഎഇ ആസ്ഥാനമായി ശരിഅത്ത് പ്രകാരം പ്രവർത്തിക്കുന്ന പ്രമുഖ ധനകാര്യ സ്ഥാപനമായ മവാരിദ് ഫിനാൻസുമായുള്ള പങ്കാളിത്തത്തോടെയാണ് വ്യാപാരികൾക്കും സാധാരണക്കാർക്കും ഒരു പോലെ പ്രയോജനകരമായ പ്രീപെയ്ഡ് കാർഡ് അവതരിപ്പിക്കുന്നത്.
സ്വർണ വിപണിയിലേക്ക് എല്ലാവർക്കും പ്രവേശനം സാധ്യമാക്കുക എന്ന ലക്ഷ്യത്തോടെ സ്ഥാപിതമായ ഒ ഗോൾഡ്, നിക്ഷേപത്തിനോ ദൈനംദിന ഉപയോഗത്തിനോ ഉള്ള സ്വർണ്ണം വെള്ളി എന്നിവ വാങ്ങാനും വിൽക്കാനും പാട്ടത്തിന് നൽകാനും വീണ്ടെടുക്കാനുമുള്ള തടസരഹിതമായ പ്ലാറ്റ്ഫോമാണ് ഉപയോക്താക്കൾക്ക് നൽകുന്നത് എന്ന് അധികൃതർ അറിയിച്ചു. സ്വർണം വീണ്ടെടുക്കൽ, സ്വർണാധിഷ്ഠിത സമ്പാദ്യസാധ്യതകൾ തുടങ്ങിയ സവിശേഷതകളും ഉൾക്കൊള്ളുന്നു. SAM പ്രഷ്യസ് മെറ്റൽസ്, AKW കൺസൾട്ടന്റ്സ് തുടങ്ങിയ ആഗോളതലത്തിൽ അംഗീകരിക്കപ്പെട്ട സ്ഥാപനങ്ങളുമായുള്ള പങ്കാളിത്തത്തോടെ സ്വർണവും ഡിജിറ്റൽ സ്വർണ്ണവും ഒ ഗോൾഡ് ഉപയോക്താക്കളിലേക്ക് എത്തിക്കുന്നു.
സുതാര്യത, സാമൂഹിക പ്രതിബദ്ധത, സമഗ്രത എന്നിവ മുൻനിർത്തി വ്യക്തികൾക്കും, ചെറുകിട, ഇടത്തരം സംരംഭകർക്കും കോർപ്പറേറ്റ് ക്ലയന്റുകൾക്കും മവാരിദ് ഫിനാൻസ് സേവനം നൽകുന്നുണ്ടെന്നും സമഗ്രമായ ധാർമിക ബാങ്കിങ്ങ്, ധനകാര്യ സേവനങ്ങൾ നൽകുന്ന സ്ഥാപനമാണ് 2006 മുതൽ യു എ ഇ ആസ്ഥാനമായി ശരിഅത്ത് പ്രകാരം പ്രവർത്തിക്കുന്ന മവാരിദ് ഫിനാൻസ് എന്നും അധികൃതർ അവകാശപ്പെടുന്നു. സ്വർണ്ണത്തിന്റെ കാലാതീതമായ മൂല്യവും പ്രായോഗികമായ ആധുനിക ഉപയോഗവും സമന്വയിപ്പിച്ചുള്ള ധാർമ്മിക സാമ്പത്തിക സേവനങ്ങൾ ഉപയോക്താക്കൾക്ക് നൽകുക എന്നതാണ് ലക്ഷ്യമെന്നും മവാരിദ് ഫിനാൻസുമായുള്ള പങ്കാളിത്തം, വിപണിയിലേക്ക് സമഗ്രവും ശരിഅത്ത് അധിഷ്ഠിതവുമായ നവീകരണം കൊണ്ടുവരാനുള്ള ദൗത്യത്തിലെ സുപ്രധാന നാഴികക്കല്ലാണെന്നും ഒ ഗോൾഡിന്റെ സ്ഥാപകൻ ബന്ദർ അലോത്ത്മാൻ പറഞ്ഞു. ഈ നവീന സംരംഭത്തിൽ ഒ ഗോൾഡുമായി സഹകരിക്കുന്നതിൽ മവാരിദ് ഫിനാൻസിന് സന്തോഷമുണ്ടെന്ന് മവാരിദ് ഫിനാൻസിന്റെ സിഇഒ റാഷിദ് അൽ ഖുബൈസി പറഞ്ഞു. കൂടുതൽ വിവരങ്ങൾക്ക് www.ogold.app അല്ലെങ്കിൽ www.mawarid.ae എന്നിവ സന്ദർശിക്കാവുന്നതാണ്.