പ്രതിപക്ഷനേതാവ് വിഡി സതീശനെതിരെ വീണ്ടും ആഞ്ഞടിച്ച് എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ. സതീശൻ അഹങ്കാരത്തിൻ്റെ ആൾരൂപമാണെന്നും വെള്ളാപ്പള്ളി നടേശൻ വിമർശിച്ചു. സ്വയം രാജാവാണെന്നാണ് സതീശന് കരുതുന്നതെന്നും അദ്ദേഹം കുറ്റപ്പെടുത്തി.
“തറ പറ പറയുന്ന ബഹുമാനമില്ലാതെ സംസാരിക്കുന്ന ആദ്യ പ്രതിപക്ഷ നേതാവാണ് വി ഡി സതീശൻ. ഞാനാണ് രാജാവ്, രാജ്ഞി, രാജ്യം എന്ന നിലയിലാണ് വി ഡി സതീശൻ പ്രവർത്തിക്കുന്നത്.കെപിസിസി പ്രസിഡന്റിനെ ധിക്കരിക്കുന്ന ഒരു പ്രതിപക്ഷ നേതാവ് മുമ്പ് ഉണ്ടായിരുന്നിട്ടില്ല. കെപിസിസി പ്രസിഡന്റ് എന്തെങ്കിലും പറഞ്ഞാല് ഉടനെ തന്നെ ആ മൈക്ക് വാങ്ങി സ്റ്റേജില് വെച്ചു തന്നെ സതീശന് എതിര് പറയുന്നത് താന് കേട്ടിട്ടുണ്ട്. കെപിസിസി പ്രസിഡന്റിനെ മൂലയ്ക്കിരുത്തിക്കൊണ്ടല്ലേ മുന്നോട്ടു പോയത്. കെ സുധാകരൻ്റെ പക്വത കൊണ്ടാണ് കോണ്ഗ്രസ് പ്രശ്നങ്ങള് ഒന്നും ഇല്ലാതെ പോകുന്നത്.” വെള്ളാപ്പള്ളി നടേശൻ പറഞ്ഞു.
തനിക്ക് പത്തെണ്പത് വയസ്സായി. ഇതിനിടയ്ക്ക് ഒട്ടേറെ കെപിസിസി പ്രസിഡന്റുമാരെയും പ്രതിപക്ഷ നേതാക്കളെയും കണ്ടിട്ടുണ്ട്. ഇത്രയും തറപറ പറയുന്ന, നിലവാരമില്ലാത്ത, ഒരു ബഹുമാനവുമില്ലാതെ സംസാരിക്കുന്ന ഒരു പ്രതിപക്ഷ നേതാവിനെ ഞാന് കണ്ടിട്ടില്ലെന്നും വെള്ളാപ്പള്ളി വിമർശിച്ചു. താന് സത്യം വിളിച്ചു പറഞ്ഞപ്പോള് നിരവധി കോണ്ഗ്രസ് നേതാക്കള് വിളിച്ച് അഭിനന്ദിച്ചു. അവര് പറയാന് ആഗ്രഹിച്ചതാണ് താന് പറഞ്ഞതെന്നും വെള്ളാപ്പള്ളി നടേശന് കൂട്ടിച്ചേര്ത്തു.
അതേസമയം രണ്ടാം പിണറായി സര്ക്കാര് ഒന്നാം സര്ക്കാരോളം മെച്ചമല്ലെന്നും വെള്ളാപ്പള്ളി നടേശൻ പറഞ്ഞു. രണ്ടാം പിണറായി സര്ക്കാരിൻ്റെ ഭരണം ഒന്നാം പിണറായി സര്ക്കാരിനെ അപേക്ഷിച്ച് മെച്ചമല്ല എന്ന് അതിനകത്തുള്ളവര് തന്നെ ചര്ച്ച ചെയ്ത് അത് നികത്താന് വേണ്ടിയുള്ള നിര്ദേശം നല്കുന്ന കാലഘട്ടത്തില് ഞാന് സത്യമല്ലേ പറയേണ്ടത്. പുതുതായി വന്ന മന്ത്രിമാരില് പ്രതീക്ഷിച്ച പ്രകടനം കാണുന്നില്ലെന്നും അദ്ദേഹം കൂട്ടിച്ചേര്ത്തു.