കമ്യൂണിസ്റ്റ് പാർട്ടി ഓഫ് ഇന്ത്യ (മാർക്‌സിസ്റ്റ്) ജനറൽ സെക്രട്ടറി സീതാറാം യെച്ചൂരി (72) അന്തരിച്ചു. ശ്വാസകോശ സംബന്ധമായ അസുഖത്തെ തുടർന്ന് കഴിഞ്ഞ മാസം ഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ പ്രവേശിപ്പിച്ചിരുന്നു. കഴിഞ്ഞ ദിവസങ്ങളിലായി അദ്ദേഹത്തിന്റെ ആരോഗ്യനില വഷളായിരുന്നു. കടുത്ത പനിയെ തുടർന്ന് ഓഗസ്റ്റ് 19നാണ് യെച്ചൂരിയെ എയിംസിലെ അത്യാഹിത വിഭാഗത്തിൽ പ്രവേശിപ്പിച്ചത്.
1952 ആഗസ്റ്റ് 12 ന് ചെന്നൈയിൽ ജനിച്ച യെച്ചൂരി ഇന്ത്യൻ രാഷ്ട്രീയത്തിലെ ഇടത് സ്വരമായി ജനങ്ങൾക്കിടയിലേയ്ക്കെത്തി. സഖ്യ രാഷ്ട്രീയത്തോടുള്ള തന്ത്രപരമായ സമീപനത്തിനും മാർക്സിസത്തിൻ്റെ തത്വങ്ങളോടുള്ള അചഞ്ചലമായ പ്രതിബദ്ധതയ്ക്കും നിലപാടുകൾക്കൊണ്ട് യെച്ചൂരി അടയാളപ്പെടുത്തി.
1974ൽ സ്റ്റുഡൻ്റ്‌സ് ഫെഡറേഷൻ ഓഫ് ഇന്ത്യ (എസ്എഫ്ഐ)യിൽ ചേർന്നതോടെയാണ് യെച്ചൂരിയുടെ രാഷ്ട്രീയ യാത്ര ആരംഭിക്കുന്നത്. മൂന്ന് തവണ ജെഎൻയു സ്റ്റുഡൻ്റ്‌സ് യൂണിയൻ പ്രസിഡൻ്റും പിന്നീട് എസ്എഫ്ഐയുടെ അഖിലേന്ത്യാ പ്രസിഡൻ്റുമായി അദ്ദേഹം വളരെ വേഗം ഉയർന്നു. 1984-ൽ സി.പി.ഐ.എമ്മിൻ്റെ കേന്ദ്രകമ്മിറ്റിയിലേക്ക് തിരഞ്ഞെടുക്കപ്പെട്ട് സ്ഥിരം ക്ഷണിതാവായി. 1992 ആയപ്പോഴേക്കും അദ്ദേഹം പോളിറ്റ് ബ്യൂറോയിൽ അംഗമായിരുന്നു, മൂന്ന് പതിറ്റാണ്ടിലേറെയായി അദ്ദേഹം ആ സ്ഥാനം വഹിച്ചു.
2005 മുതൽ 2017 വരെ പശ്ചിമ ബംഗാളിൽ നിന്ന് രാജ്യസഭാംഗമായി യെച്ചൂരി സേവനമനുഷ്ഠിച്ചു. പ്രകാശ് കാരാട്ടിൻ്റെ പിൻഗാമിയായി 2015-ൽ സി.പി.ഐ.എമ്മിൻ്റെ ജനറൽ സെക്രട്ടറിയായി. 2018-ലും 2022-ലും രണ്ട് തവണ ആ സ്ഥാനത്തേക്ക് വീണ്ടും തിരഞ്ഞെടുക്കപ്പെട്ടു.