രണ്ടര മണിക്കൂറിലേറെ നീണ്ട ആഘോഷപരിപാടികൾക്കൊടുവിൽ കഴിഞ്ഞ 16 ദിവസത്തെ വർണാഭമായ പാരീസ് ഒളിംപിക്സിന് സ്റ്റാഡ് ദ് ഫ്രാൻസ് സ്റ്റേഡിയത്തിൽ ശുഭകരമായ പര്യവസാനം.ഹോക്കിയിൽ വെങ്കലം നേടിയ ഇന്ത്യൻ ടീം ഗോൾ കീപ്പർ പി ആർ ശ്രീജേഷും ഇരട്ടവെങ്കലം നേടിയ ഷൂട്ടിങ് താരം മനു ഭാക്കറുമാണ് രണ്ടരമണിക്കൂറിലേറെ നീണ്ട ആഘോഷപരിപാടിയുടെ ഭാഗമായി നടന്ന മാർച്ച് പാസ്റ്റിൽ ഇന്ത്യയുടെ പതാകയേന്തിയത്. സസ്പെൻസുകൾക്ക് വിരാമമിട്ട് ഹോളിവുഡ് താരം ടോം ക്രൂസ് കൂടി എത്തിയതോടെ 2024 ഒളിംപിക്സിന് ശുഭകരമായ പര്യവസാനം. അടുത്ത ഒളിംപിക്സിനു വേദിയാകുന്ന ലൊസാഞ്ചലസ് നഗരത്തിന്റെ മേയർ കരൻ ബാസ്, പാരിസ് മേയർ ആനി ഹിഡാൽഗോയിൽനിന്ന് ഒളിംപിക് പതാക ഏറ്റുവാങ്ങി. 2028ലാണ് യുഎസ് നഗരം അടുത്ത ഒളിംപിക്സിനു വേദിയാവുക.
ഒളിംപിക്സ് ദീപം ഉയർന്നു കത്തിയ ജാർഡിൻസ് ദെസ് ടുയ്ലെറീസിലേക്ക് ഫ്രാന്സിന്റെ നീന്തൽ താരം ലിയോൺ മെർച്ചന്റ് കടന്നുവന്നതോടെയാണു പരിപാടികൾക്കു തുടക്കമായത്. റാന്തലിൽ ദീപവും കയ്യിലേന്തിയായിരുന്നു താരത്തിന്റെ വരവ്. പ്രസിദ്ധമായ ഫ്രാൻസിലെ ഫീനിക്സ് ബാങ്കിന്റെ സംഗീത പരിപാടികളും സ്റ്റാഡ് ദ് ഫ്രാൻസ് സ്റ്റേഡിയത്തിൽ അരങ്ങേറി. 70,000 കാണികളായിരുന്നു ചടങ്ങിന് സാക്ഷിയായത്. വിവിധ രാജ്യങ്ങളുടെ പതാകകളുമായി അത്ലീറ്റുകൾ സ്റ്റേഡിയത്തിലേക്കു പ്രവേശിച്ചു. വനിതാ മാരത്തണിൽ വിജയിച്ച സിഫാൻ ഹസൻ (സ്വർണം), അസഫ ടിസ്റ്റ് (വെള്ളി), ഒബിരി ഹെലൻ (വെങ്കലം) എന്നിവർക്ക് വേദിയിൽവച്ച് ഐഒഎ ചീഫ് തോമസ് ബാഷ് മെഡലുകൾ നൽകി. വനിതാ മാരത്തൺ വിജയികൾക്കുള്ള മെഡൽ സമർപ്പണച്ചടങ്ങ് സമാപനത്തിന്റെ ഭാഗമായിട്ടാണു പരമ്പരാഗതമായി നടക്കുന്നത്.
പോയിന്റ് പട്ടികയിൽ ഒന്നാമതെത്താൻ നടന്ന ഇഞ്ചോടിഞ്ച് മത്സരത്തിൽ അമേരിക്ക അവസാന നിമിഷം 126 മെഡലുകൾ നേടി മുന്നേറുകയായിരുന്നു. ഒരു വെള്ളിയും അഞ്ച് വെങ്കലവുമടക്കം ആറ് മെഡലുകളാണ് ഇന്ത്യയുടെ പാരിസിലെ നേട്ടം. ടോക്കിയോ ഒളിംപിക്സിലെ പോലെ സ്വർണമെഡൽ നേടാൻ ഇത്തവണ ഇന്ത്യക്കായില്ല എന്ന നിരാശയും ബാക്കിയാണ്. ഇന്ത്യ പാരീസിൽ നിന്ന് മടങ്ങുന്നത്. ടോക്കിയോയിലെ റെക്കോർഡിനൊപ്പമെത്താനോ സ്വർണമെഡൽ നേടാനോ ഇന്ത്യക്കായില്ല. മെഡൽ പട്ടികയിൽ എഴുപത്തിയൊന്നാം സ്ഥാനത്താണ് ഇന്ത്യ