യുഎഇയിലെ അബുദാബിയിൽ ബാപ്‌സ് ഹിന്ദു ക്ഷേത്രം ഉദ്ഘാടനത്തിന് തയ്യാറെടുക്കുന്നു. ഫെബ്രുവരി 14ന് പ്രധാനമന്ത്രി നരേന്ദ്രമോദി ക്ഷേത്രം ഉദ്ഘാടനം ചെയ്യും. അബുദാബിയിലെ ബാപ്‌സ് ഹിന്ദു ക്ഷേത്രം പ്രധാനമന്ത്രി ഉദ്ഘാടനം ചെയ്യുന്നതിന് ഒരു ദിവസം മുൻപ് ‘അഹ്‌ലൻ മോദി’ എന്ന പരിപാടി സംഘടിപ്പിക്കും. ഇവിടെ പ്രധാനമന്ത്രി പ്രവാസി ഇന്ത്യക്കാരെ അഭിസംബോധന ചെയ്യും. 50,000-ത്തിലധികം ആളുകൾ പരിപാടിയിൽ പങ്കെടുക്കുമെന്നാണ് പ്രതീക്ഷിക്കുന്നത്. യുഎഇ ഭരണാധികാരികള്‍ തന്നെയാണ് ഹിന്ദുക്ഷേത്രം പണിയാന്‍ ഭൂമി നല്‍കിയത്.
യുഎഇയിലെ ഏറ്റവും വലിയ ക്ഷേത്രമായ ബാപ്‌സ് ഹിന്ദു ക്ഷേത്രം ഉദ്ഘാടനം ചെയ്യാനുള്ള ക്ഷണം പ്രധാനമന്ത്രി മോദി സ്വീകരിച്ചതായി ബാപ്‌സ് സ്വാമിനാരായണ സൻസ്തയുടെ പ്രസ്താവനയിൽ നേരത്തെ അറിയിച്ചിരുന്നു. സ്വാമി ഈശ്വരചരന്ദാസിന്റെയും സ്വാമി ബ്രഹ്മവിഹാരിദാസിന്റെയും നേതൃത്വത്തിൽ ബാപ്‌സ് സംഘടനയുടെ പ്രതിനിധികളാണ് പ്രധാനമന്ത്രിയെ ഡൽഹിയിലെ വസതിയിലെത്തി നേരിട്ട് ഉദ്ഘാടനത്തിനുള്ള ക്ഷണം അറിയിച്ചത്. അറബ് രാജ്യത്ത് ക്ഷേത്രം ഉദ്ഘാടനം ചെയ്യാനുള്ള ക്ഷണം പ്രധാനമന്ത്രി മോദി സ്വീകരിച്ചതായും അവർ അറിയിച്ചിരുന്നു.
വിരിഞ്ഞുനിൽക്കുന്ന താമരപ്പൂവിന്റെ രൂപത്തിലാണ് ബാപ്‌സ് ഹിന്ദു ക്ഷേത്രം നിർമ്മിച്ചിരിക്കുന്നത്. കഴിഞ്ഞ വർഷം നവംബർ 30 മുതൽ ഡിസംബർ ഒന്ന് വരെ ദുബായിൽ നടന്ന COP28 കാലാവസ്ഥാ ഉച്ചകോടിയിൽ പങ്കെടുത്ത പ്രധാനമന്ത്രി മോദി യുഎഇയും സന്ദർശിച്ചിരുന്നു. അതേസമയം ചടങ്ങുകളില്‍ പൊതുജനങ്ങള്‍ക്കും പങ്കെടുക്കാമെന്നാണ് വിവരം. ഇതിന് മുന്‍കൂട്ടിയുളള രജിസ്ട്രേഷന്‍ ആവശ്യമാണ്. 16,17 തീയതികളിലും ക്ഷണിക്കപ്പെട്ടവര്‍ക്കും മുന്‍കൂട്ടി രജിസ്റ്റര്‍ ചെയ്യുന്നവര്‍ക്കും മാത്രമായിരിക്കും പ്രവേശനം അനുവദിക്കുക. ഫെബ്രുവരി 18 മുതലായിരിക്കും എല്ലാ വിഭാഗം ജനങ്ങള്‍ക്കും ക്ഷേത്രത്തില്‍ പ്രവേശനം അനുവദിക്കുക. ബിഎപിഎസ് ആണ് ഈ ഹിന്ദുക്ഷേത്രം പണിയുന്നത്. BAPS സ്വാമിനാരായൺ സൻസ്ത നിർമ്മിക്കുന്ന ഒരു പരമ്പരാഗത ഹിന്ദു ആരാധനാലയമാണ് യുഎഇയിലെ BAPS ഹിന്ദു മന്ദിർ. ദുബായ്-അബുദാബി ഷെയ്ഖ് സായിദ് ഹൈവേയിൽ അൽ റഹ്ബയ്‌ക്ക് സമീപമുള്ള അബു മുറൈഖയിലാണ് ക്ഷേത്ര സമുച്ചയം സ്ഥിതി ചെയ്യുന്നത്.
2022 സെപ്റ്റംബറിൽ ആണ് അക്ഷര്‍ധാം മാതൃകയില്‍ അബുദാബിയില്‍ നിര്‍മ്മിക്കുന്ന ക്ഷേത്രത്തില്‍ ആദ്യ മാര്‍ബിള്‍ തൂണ്‍ സ്ഥാപിച്ചത്. കൊത്തുപണികളോട് കൂടിയ ആദ്യ മാര്‍ബിള്‍ തൂണാണ് സ്ഥാപിച്ചത്. അന്ന് യു എ ഇ വിദേശ-വ്യാപാര സഹമന്ത്രി ഡോ. താനി ബിന്‍ അഹ്മദ് അല്‍ സയൂദി, സാമൂഹിക വികസന വിഭാഗം ചെയര്‍മാന്‍ ഡോ. മുഗീര്‍ ഖമീസ് അല്‍ ഖൈലി, ആഭ്യന്തര മന്ത്രാലയത്തിലെ വിദ്യാഭ്യാസ, പരിശീലന വികസന വിഭാഗം ഡയറക്ടര്‍ ജനറല്‍ ഡോ. തെയാബ് അല്‍ കമാലി, ഇന്ത്യന്‍ സ്ഥാനപതി സഞ്ജയ് സുധീര്‍, സ്വാമി ഈശ്വര്‍ചരണ്‍, സ്വാമി ബ്രഹ്മവിഹാരി ദാസ് എന്നിവര്‍ ചേര്‍ന്നാണ് കര്‍മ്മം നിര്‍വഹിച്ചത്.