മിത്ത് വിവാദവുമായി ജയ് ഗണേഷ് എന്ന തന്റെ ചിത്രത്തിന് ബന്ധമില്ലെന്ന് സംവിധായകൻ രഞ്ജിത് ശങ്കർ പറഞ്ഞു. ചിത്രത്തിന്റെ പേര് ഒരു മാസം മുൻപ് തന്നെ രജിസ്റ്റർ ചെയ്തതാണെന്നും രഞ്ജിത്ത് പറഞ്ഞു. കേരള ഫിലിം ചേംബറിൽ ജയ് ഗണേഷ് ടൈറ്റിൽ രജിസ്റ്റർ ചെയ്തതിന്റെ തെളിവും സംവിധായകൻ പങ്കുവെച്ചിട്ടുണ്ട്.
ഒറ്റപ്പാലത്തെ ഗണേശോത്സവത്തിൽ വച്ചായിരുന്നു സിനിമ പ്രഖ്യാപിച്ചത്. പിന്നാലെ സോഷ്യൽ മീഡിയയിലൂടെയും സിനിമ പ്രഖ്യാപിച്ചിരുന്നു. ഉണ്ണിമുകുന്ദൻ ഫിലിംസ് ആണ് ചിത്രം നിർമ്മിക്കുന്നത്. സമീപകാലത്തെ ഗണേശ വിവാദങ്ങളുമായി ബന്ധപ്പെടുത്തി നിരവധി പേർ കമൻറുകൾ ചെയ്യുകയും പോസ്റ്റുകൾ പങ്കുവയ്ക്കുകയും ചെയ്തിരുന്നു.
ചിത്രത്തിന്റെ ടൈറ്റിൽ പ്രഖ്യാപിച്ചതിന് പിന്നാലെ മിത്ത് വിവാദവുമായി ബന്ധപ്പെടുത്തി പലതരത്തിലുള്ള ചർച്ചകളും സോഷ്യൽ മീഡിയയിൽ ഉയർന്നതോടെയാണ് സംഭവത്തിൽ പ്രതികരണവുമായി സംവിധായകൻ രംഗത്തുവന്നത്. ‘ഇന്നലെ സിനിമയുടെ പ്രഖ്യാപനം മുതലുള്ള എല്ലാ വ്യാപകമായ വാർത്തകൾക്കും അറുതിവരുത്താൻ, പ്രസ്തുത വിവാദത്തിന് ഒരു മാസം മുമ്പേ കേരള ഫിലിം ചേംബറിൽ ടൈറ്റിൽ രജിസ്റ്റർ ചെയ്തു’, എന്നാണ് രഞ്ജിത് സോഷ്യൽ മീഡിയയിൽ കുറിച്ചത്.