റഷ്യയുമായുള്ള യുദ്ധത്തിനിടെ സൈനികരെ റിക്രൂട്ട് ചെയ്ത എല്ലാ സൈനിക തലവന്മാരെയും പുറത്താക്കി യുക്രൈന്‍ പ്രസിഡന്റ് വോളോഡിമര്‍ സെലെന്‍സ്‌കി. സൈനിക റിക്രൂട്ട്മെന്റിൽ അഴിമതി കേസുകള്‍ വര്‍ധിക്കുന്ന സാഹചര്യത്തിലാണ് സെലന്‍സ്‌കിയുടെ നടപടി. രാജ്യത്തെ എല്ലാ സൈനിക റിക്രൂട്ട്മെന്റ് കേന്ദ്രങ്ങളുടെയും മേധാവികളെ പിരിച്ചുവിടുകയാണെന്നും വ്യാപകമായ അഴിമതിയെക്കുറിച്ച് 112 കേസുകളില്‍ അന്വേഷണം ആരംഭിച്ചതായും സെലെന്‍സ്‌കി പറഞ്ഞു.33 റിക്രൂട്ട്മെന്റ് മേധാവികളെ പിരിച്ചുവിട്ടിട്ടുണ്ട്.
എല്ലാ റീജിയണല്‍ റിക്രൂട്ട്മെന്റ് സെന്ററുകളുടെയും തലവന്മാരെ പിരിച്ചുവിട്ട് രാജ്യത്തിന്റെ അന്തസ്സ് കാത്തുസൂക്ഷിച്ച ധീരരായ പോരാളികളെ നിയമിക്കുമെന്ന് അദ്ദേഹം അറിയിച്ചു. യുദ്ധ പരിചയമുള്ള സൈനികരെ നിയമിക്കും. യുദ്ധം എന്താണെന്ന് ശരിക്കും അറിയാവുന്ന ആളുകളാണ് ഈ സംവിധാനം പ്രവര്‍ത്തിപ്പിക്കേണ്ടത്. ആരോഗ്യം നഷ്ടപ്പെട്ടവരും കൈകാലുകള്‍ നഷ്ടപ്പെട്ടവരും, എന്നാല്‍ രാജ്യത്തിന്റെ അന്തസ്സ് കാത്തുസൂക്ഷിക്കുന്നവരുമായ സൈനികരെ മാത്രമേ റിക്രൂട്ട് ചെയ്യാന്‍ കഴിയൂവെന്നും സെലെന്‍സ്‌കി വ്യക്തമാക്കി.
യുക്രയിനും റഷ്യയും തമ്മിൽ നടക്കുന്ന യുദ്ധത്തില്‍ റഷ്യയിലെ 1.80 ലക്ഷം സൈനികരും യുക്രൈനിലെ ഒരു ലക്ഷം സൈനികരും കൊല്ലപ്പെടുകയോ പരിക്കേല്‍ക്കുകയോ ചെയ്തിട്ടുണ്ടെന്നാണ് പാശ്ചാത്യ രാജ്യങ്ങളിലെ ഉദ്യോഗസ്ഥരുടെ കണക്ക്. അതേസമയം, 2023 ഫെബ്രുവരി 23 ഓടെ 1,45,850 റഷ്യന്‍ സൈനികര്‍ കൊല്ലപ്പെട്ടെന്നാണ് യുക്രൈന്‍ അവകാശപ്പെട്ടത്. എന്നാല്‍ യുക്രൈന്‍ ഒരിക്കലും സ്വന്തം സൈനികരുടെ മരണസംഖ്യ പുറത്തുവിട്ടിട്ടില്ല.