ലൈഫ് മിഷന് കേസില് ജാമ്യം തേടി മുഖ്യമന്ത്രി പിണറായി വിജയന്റെ മുന് പ്രിന്സിപ്പല് സെക്രട്ടറി എം.ശിവശങ്കര് ഹൈക്കോടതിയെ സമീപിച്ചു. ചികിത്സാ കാരണങ്ങള് ചൂണ്ടിക്കാട്ടിയാണ് ശിവശങ്കര് ജാമ്യാപേക്ഷ നല്കിയിരിക്കുന്നത്. ഇഡി തന്നെ വേട്ടയാടുകയാണെന്നും ശിവശങ്കർ ഹര്ജിയിൽ ആരോപിക്കുന്നു. കേസിലെ മറ്റ് പ്രതികളെയൊന്നും അറസ്റ്റ് ചെയ്തിട്ടില്ല. ആരോഗ്യ സ്ഥിതി പോലും പരിഗണിക്കാതെയാണ് തന്നെ മാത്രം അറസ്റ്റ് ചെയ്ത് ജയിലിലടച്ചത് എന്നും ഹർജിയിൽ പറയുന്നു..
ലൈഫ് മിഷന് കരാർ കേസിലെ മറ്റ് പ്രതികളായ സ്വപ്ന സുരേഷ്, പി.എസ് സരിത്ത്, സന്ദീപ് നായര്, സന്തോഷ് ഈപ്പന് എന്നിവരുടെ മൊഴികൾ ഇ.ഡി നേരത്തെ വിശദമായി രേഖപ്പെടുത്തിയിരുന്നു. ആറ് കോടിയുടെ കോഴ ഇടപാട് നടന്നെന്നാണ് സ്വപ്നയുടെ ആരോപണം. ഇടപാട് ശരിവെക്കുന്ന മൊഴി തന്നെയാണ് ഭവന നിര്മാണ കരാറെടുത്ത യൂണിടാക് ഉടമ സന്തോഷ് ഈപ്പനും നല്കിയത്. യൂണിറ്റാക്കിന് തന്നെ കരാര് ലഭിക്കാന് മുഖ്യമന്ത്രിയെ കൊണ്ട് സമ്മതിപ്പിച്ചതിനാണ് ഒരു കോടി രൂപ എം ശിവശങ്കറിന് ലഭിച്ചതെന്നാണ് സ്വപ്ന സുരേഷിന്റെ മൊഴി. ലൈഫ് മിഷന് കരാര് ലഭിക്കാന് 4.48 കോടി രൂപ കോഴ നല്കിയെന്നായിരുന്നു സന്തോഷ് ഈപ്പന്റെ വെളിപ്പെടുത്തല്. കരാറില് മൂന്നുകോടി 38 ലക്ഷം രൂപയുടെ കോഴ ഇടപാട് നടന്നെന്നാണ് എന്ഫോഴ്സ്മെന്റ് ഡയറക്ട്രേറ്റിന്റെ റിപ്പോര്ട്ട്.
കരാര് ലഭിക്കാന് ഇടനില നിന്ന സ്വപ്ന സുരേഷിന് 1 കോടി ലഭിച്ചെന്നും സ്വപ്നയുടെ ലോക്കറില് നിന്ന് കണ്ടെത്തിയത് ഈ കള്ളപ്പണമാണെന്നുമായിരുന്നു ഇഡി കണ്ടെത്തല്. ഇതിലുള്ള ഒരു കോടിയോളമുള്ള തുക ശിവശങ്കറിന്റെതാണെന്ന് മുന്പ് ഇഡി വ്യക്തമാക്കിയിരുന്നു. സ്വര്ണ്ണക്കടത്ത് കേസില് സ്വപ്നയുടെ ലോക്കര് ഇഡി കണ്ടുകെട്ടിയിരുന്നു. കരാറിന് മുന്കൈയ്യെടുത്ത എം ശിവശങ്കറിന് ഒരു കോടി രൂപയും മൊബൈല് ഫോണും ലഭിച്ചതിന് തെളിവുണ്ടെന്ന് ഇഡിയുടെ അറസ്റ്റ് റിപ്പോര്ട്ടില് പറയുന്നു. വടക്കാഞ്ചേരി ലൈഫ് മിഷന് പദ്ധതിയുടെ കരാര് ലഭിക്കുന്നതിന് മുന്പ് തന്നെ മുന്കൂറായി കമ്മീഷന് ഇടപാട് നടന്നെന്നാണ് ഇഡി വ്യക്തമാക്കുന്നത്. മൂന്ന് മില്യണ് ദിര്ഹത്തിന് ആയിരുന്നു കമ്മീഷന് ഇടപാട് ഉറപ്പിച്ചത്. കരാര് ഉറപ്പിക്കുന്നതിന് മുന്പ് എം ശിവശങ്കറും സ്വപ്ന സുരേഷും നടത്തിയ വാട്സ്ആപ്പ് ചാറ്റുകള് കോഴ ഇടപാടിനും കള്ളപ്പണക്കേസിനും തെളിവാണെന്ന് ഇഡി വിശദീകരിക്കുന്നു.