ബിബിസി ഡോക്യുമെന്ററിയുമായി ബന്ധപ്പെട്ട വിവാദങ്ങൾക്കിടയിൽ, പ്രധാനമന്ത്രി നരേന്ദ്ര മോദിയെ “ഭൂമിയിലെ ഏറ്റവും ശക്തരായ വ്യക്തികളിൽ ഒരാൾ” എന്ന വിശേഷിപ്പിച്ചുകൊണ്ട് യുകെ പാർലമെന്റ് അംഗം ലോർഡ് കരൺ ബിലിമോറിയ.
“ഇന്ന് ജി20യുടെ അധ്യക്ഷസ്ഥാനം ഇന്ത്യയ്ക്കാണ്. അടുത്ത 25 വർഷത്തിനുള്ളിൽ 32 ബില്യൺ യുഎസ് ഡോളർ ജിഡിപിയുള്ള ലോകത്തിലെ രണ്ടാമത്തെ വലിയ സമ്പദ്‌വ്യവസ്ഥയായി മാറാനുള്ള കാഴ്‌ചപ്പാട് ഇന്ന് ഇന്ത്യക്കുണ്ട്. ‘ഇന്ത്യൻ എക്സ്പ്രസ്’ സ്‌റ്റേഷൻ വിട്ടു കഴിഞ്ഞു, ഇത് ഇപ്പോൾ ലോകത്തിലെ ഏറ്റവും വേഗതയേറിയ ട്രെയിനാണ്– അതായത് ലോകത്തിലെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥ. വരാനിരിക്കുന്ന ദശകങ്ങളിൽ യുകെ അവരുടെ ഏറ്റവും അടുത്ത സുഹൃത്തും പങ്കാളിയും ആയിരിക്കണം” അദ്ദേഹം പറഞ്ഞു.
അതെ സമയം വിവാദമായ ബിബിസി ഡോക്യുമെന്ററിക്ക് ശേഷം യുകെ പ്രധാനമന്ത്രി ഋഷി സുനക്കും പ്രധാനമന്ത്രി മോദിയെ ന്യായീകരിച്ചു. പാക് വംശജനായ ഒരു ബ്രിട്ടീഷ് എംപി യുകെ പാർലമെന്റിൽ വിഷയം അവതരിപ്പിച്ചപ്പോൾ, പ്രധാനമന്ത്രി മോദിയെ അവതരിപ്പിച്ച രീതിയോട് താൻ യോജിക്കുന്നില്ലെന്ന് സുനക് വ്യക്തമാക്കിയിരുന്നു.
ബിബിസിയുടെ രണ്ട് ഭാഗങ്ങളുള്ള “ഇന്ത്യ: ദി മോദി ക്വസ്‌റ്റിയന്‍” എന്ന പരമ്പര കഴിഞ്ഞയാഴ്‌ച പുറത്തിറങ്ങിയതിന് ശേഷം ഒവിവാദങ്ങൾ ഉടലെടുത്തിരുന്നു. 2002ലെ ഗുജറാത്ത് കലാപകാലത്ത് ഗോധ്രയിൽ ഹിന്ദു തീർഥാടകർ സഞ്ചരിച്ചിരുന്ന തീവണ്ടി കത്തിച്ചതിനെ തുടർന്നുണ്ടായ അക്രമസംഭവങ്ങളിൽ പ്രധാനമന്ത്രി മോദിയുടെ നേതൃത്വത്തെ ഡോക്യുമെന്ററി ചോദ്യം ചെയ്യുന്നു. 2002ലെ ഗുജറാത്ത് കലാപത്തിൽ 1000ത്തിലധികം ആളുകൾ കൊല്ലപ്പെട്ടിരുന്നു.
ബിബിസി ഡോക്യുമെന്ററിയുടെ ആദ്യ എപ്പിസോഡ് പ്രസിദ്ധീകരിച്ച ഒന്നിലധികം യൂട്യൂബ് വീഡിയോകൾ ബ്ലോക്ക് ചെയ്യുന്നതിനുള്ള നിർദ്ദേശങ്ങൾ ശനിയാഴ്‌ച ഇൻഫർമേഷൻ ആൻഡ് ബ്രോഡ്‌കാസ്റ്റിംഗ് മന്ത്രാലയം പുറപ്പെടുവിച്ചു. ബിബിസി സീരീസിലേക്കുള്ള ലിങ്കുമായി ബന്ധപ്പെട്ട 50ലധികം ട്വീറ്റുകൾ തടയാൻ ട്വിറ്ററിനോട് ആവശ്യപ്പെട്ടതായും അവർ പറഞ്ഞു. യൂട്യൂബും ട്വിറ്ററും നിർദ്ദേശങ്ങൾ പാലിച്ചതായി വൃത്തങ്ങൾ അറിയിച്ചു.