ചെന്നൈ: തമിഴ്നാട്ടിലെ കാഞ്ചീപുരത്ത്‌ മലയാളി പെൺകുട്ടി കൂട്ടബലാത്സംഗത്തിന് ഇരയായി. കാഞ്ചിപുരത്തെ വിനോദസഞ്ചാരകേന്ദ്രമായ സിവിലിമേട്ടിലായിരുന്നു സംഭവം. സുഹൃത്തിനോടൊപ്പം ഇവിടെ എത്തിയ പെൺകുട്ടിയെ പ്രദേശവാസികളായ ആറു പേർ ചേർന്ന് പീഡിപ്പിക്കുകയായിരുന്നു. സംഭവത്തിൽ കാഞ്ചീപുരം സ്വദേശികളായ മണികണ്ഠൻ, വിപ്പേട് വിമൽ, ശിവകുമാർ, തെന്നരസു, തമിഴരസൻ, വിഘ്നേഷ് എന്നിവരെ പോലീസ് അറസ്റ്റ് ചെയ്തു.
തമിഴ്നാട്ടിൽ കോളേജിൽ പഠിക്കുന്ന പെൺകുട്ടിയാണ് പീഡനത്തിനിരയായത്. പെൺകുട്ടിയും സുഹൃത്തും ഒരുമിച്ച് നടന്നു പോകവേ രണ്ടുപേർ ആദ്യം ആക്രമിക്കുകയായിരുന്നു. സുഹൃത്തിനെ കത്തി കാട്ടി ഭീഷണിപ്പെടുത്തിയ സംഘം പെൺകുട്ടിയെ ആളൊഴിഞ്ഞ ഇടത്തേക്ക് കൂട്ടിക്കൊണ്ടു പോയി പീഡിപ്പിച്ചുവെന്നാണ് പരാതി. തിരിച്ച് വീട്ടിലെത്തിയ പെൺകുട്ടി പോലീസിൽ വിവരം അറിയിക്കുകയായിരുന്നു. മുൻപും സമാനമായ കുറ്റകൃത്യങ്ങൾ പ്രതികൾ ചെയ്തിരുന്നതായും പോലീസ് പറഞ്ഞു.