പ്രധാനമന്ത്രി നരേന്ദ്രമോദി നാളെ കേരളത്തിലെത്തും. ഉച്ചയോടെ കൊച്ചിയിലെത്തുന്ന അദ്ദേഹം തൃശ്ശൂരിലേക്ക് പോകും. തേക്കിന്കാട് മൈതാനം ചുറ്റിയുള്ള റോഡ് ഷോയില് അദ്ദേഹം പങ്കെടുക്കും. റോഡ് ഷോയ്ക്ക് ശേഷം നടക്കുന്ന മഹിളാ സമ്മേളനത്തില് മോദി സംസാരിക്കും. വൈകിട്ട് മൂന്ന് മണിക്ക് നടക്കുന്ന പരിപാടിയില് രണ്ട് ലക്ഷം വനിതകള് പങ്കെടുക്കുമെന്നാണ് വിവരം. അങ്കണവാടി ടീച്ചര്മാര്, ആശാ വര്ക്കര്മാര്, തൊഴിലുറപ്പ് തൊഴിലാളികള് അടക്കം സമൂഹത്തിന്റെ വിവിധ മേഖലകളിലെ വനിതകള് പരിപാടിയില് പങ്കാളികളാകും. നേരത്തെ കൊച്ചിയില് സംഘടിപ്പിച്ച യുവം പരിപാടി പോലെയാകും തൃശ്ശൂരിലെ പരിപാടി.
പ്രധാനമന്ത്രി നരേന്ദ്രമോദിയുടെ വിരുന്നില് ക്രൈസ്തവ മതമേലധ്യക്ഷന്മാര് പങ്കെടുത്തതിനെ ചൊല്ലിയുള്ള വിവാദം കത്തി പടരുന്നതിനിടെയാണ് പ്രധാനമന്ത്രി കെരളത്തിൽ എത്തുന്നത്. ഇന്ന് തമിഴ്നാട്ടിലാണ് പ്രധാനമന്ത്രിയുടെ സന്ദര്ശനം. വികസന പദ്ധതികളുടെ ഉദ്ഘാടനത്തിനായാണ് പ്രധാനമന്ത്രി തമിഴ്നാട്ടിലെത്തുന്നത്. റോഡ് – റെയില് -വ്യോമഗതാഗത മേഖലയിലായി 19,500 കോടി രൂപയുടെ വികസന പദ്ധതികള് ഉദ്ഘാടനം ചെയ്യും. ലോക്സഭ തിരഞ്ഞെടുപ്പിന് മുന്നോടിയായാണ് മോദിയുടെ സന്ദര്ശനങ്ങള്.