തിരുവനന്തപുരം: സംസ്ഥാനത്തെ മുഴുവൻ സർവ്വകലാശാലകളിലും പ്രസവാവധിയും ആർത്തവാവധിയും നൽകാൻ ഉന്നതവിദ്യാഭ്യാസ വകുപ്പ് ഉത്തരവിട്ടു. ഉന്നതവിദ്യാഭ്യാസ വകുപ്പ് മന്ത്രി ഡോക്ടർ ആർ.ബിന്ദുവാണ് ഇക്കാര്യം അറിയിച്ചത്. വിദ്യാർത്ഥിനികൾക്ക് അറ്റൻഡൻസിനുള്ള പരിധി ആർത്തവാവധി ഉൾപ്പെടെ 73 ശതമാനമായി നിശ്ചയിച്ചിട്ടുണ്ട്. 18 വയസ്സ് കഴിഞ്ഞ വിദ്യാർത്ഥിനികൾക്ക് പരമാവധി 60 ദിവസം വരെ പ്രസവാവധിയും ലഭിക്കും.
സാധാരണ നിലയിൽ വിദ്യാർഥികൾക്ക് ഓരോ സെമസ്റ്ററിലും പരീക്ഷ എഴുതാൻവേണ്ട ഹാജർ പരിധിയിൽ കുറവ് വരുത്തിക്കൊണ്ട് ആർത്തവഅവധി നൽകി ആദ്യം നിയമഭേദഗതി വരുത്തിയത് കുസാറ്റ് ആണ്. ഇത് എല്ലാവരാലും ഏറെ പ്രശംസിക്കപ്പെട്ട ഒരു നടപടിയായി മാറിയിരുന്നു. തുടർന്ന് സാങ്കേതിക സർവ്വകലാശാലയും ഈ തീരുമാനത്തെ അംഗീകരിച്ചു ആർത്തവ അവധി നൽകിക്കൊണ്ട് മുന്നോട്ടുവന്നു. ഉന്നത വിദ്യാഭ്യാസ വകുപ്പിന് കീഴിലുള്ള മുഴുവൻ സർവ്വകലാശാലയിലും ഈ ഭേദഗതി വരുത്തുന്നതിനെപ്പറ്റി ആലോചിക്കുമെന്ന് ഉന്നത വിദ്യാഭ്യാസ വകുപ്പ് മന്ത്രി ഡോക്ടർ ആർ. ബിന്ദു പറഞ്ഞിരുന്നു. ഇതിനു പിന്നാലെയാണ് ഇപ്പോൾ പുതിയ ഉത്തരവ് ഇറങ്ങിയിരിക്കുന്നത്. സർവ്വകലാശാലാ നിയമങ്ങളിൽ ഇതിനാവശ്യമായ ഭേദഗതികൾ വരുത്താൻ മുഴുവൻ സർവ്വകലാശാലകൾക്കും നിർദ്ദേശം നൽകിയതായും മന്ത്രി അറിയിച്ചു.