ലൈഫ് മിഷന് കേസില് എം ശിവശങ്കറിന് ജാമ്യമില്ല. ലൈഫ് മിഷന് അഴിമതിക്കേസില് എം ശിവശങ്കറിന് ജാമ്യമില്ല.കേസിലെ അന്വേഷണം പ്രാഥമിക ഘട്ടത്തിലാണെന്നും ഉന്നത സ്വധീനമുള്ള ശിവശങ്കറിന് ജാമ്യം നല്കുന്നത് അന്വേഷണത്തെ ബാധിക്കുമെന്നുമുള്ള ഇഡി വാദം അംഗീകരിച്ച് ജാമ്യാപേക്ഷ കൊച്ചിയിലെ പ്രത്യേക സിബിഐ കോടതി തള്ളി.
നിലവില് കാക്കനാട് ജില്ലാ ജയിലില് ആണ് ശിവശങ്കര് റിമാന്ഡില് കഴിയുന്നത്. തന്നെ പ്രതി ചേര്ത്തത് തെറ്റായ നടപടിയാണെന്നും തനിക്കെതിരെ മൊഴികള് മാത്രമാണുള്ളതെന്നും ശിവശങ്കര് വാദിച്ചിരുന്നു. തനിക്ക് കടുത്ത ആരോഗ്യ പ്രശ്നങ്ങള് ഉണ്ടെന്നും ജാമ്യം വേണമെന്നും ഹര്ജിയില് ആവശ്യപ്പെട്ടിരുന്നു.
ലൈഫ് മിഷന് കരാറില് മൂന്നുകോടി 38 ലക്ഷം രൂപയുടെ കോഴ ഇടപാട് നടന്നെന്നാണ് എന്ഫോഴ്സ്മെന്റ് ഡയറക്ട്രേറ്റിന്റെ റിപ്പോര്ട്ട്. കരാറിന് മുന്കൈയ്യെടുത്ത എം ശിവശങ്കറിന് ഒരു കോടി രൂപയും മൊബൈല് ഫോണും ലഭിച്ചതിന് തെളിവുണ്ടെന്ന് ഇഡിയുടെ അറസ്റ്റ് റിപ്പോര്ട്ടില് പറയുന്നു. നേരത്തെ കേസിലെ മറ്റ് പ്രതികളായ സ്വപ്ന സുരേഷ്, പി.എസ് സരിത്ത്, സന്ദീപ് നായര്, സന്തോഷ് ഈപ്പന് എന്നിവരുടെ മൊഴികളും ഇ.ഡി വിശദമായി രേഖപ്പെടുത്തിയിരുന്നു. കരാര് ഉറപ്പിക്കുന്നതിന് മുന്പ് എം ശിവശങ്കറും സ്വപ്ന സുരേഷും നടത്തിയ വാട്സ്ആപ്പ് ചാറ്റുകള് കോഴ ഇടപാടിനും കള്ളപ്പണക്കേസിനും തെളിവാണെന്ന് ഇഡി വിശദീകരിക്കുന്നു. ആറ് കോടിയുടെ കോഴ ഇടപാട് നടന്നെന്നാണ് സ്വപ്നയുടെ ആരോപണം. ഇടപാട് ശരിവെക്കുന്ന മൊഴി തന്നെയാണ് ഭവന നിര്മാണ കരാറെടുത്ത യൂണിടാക് ഉടമ സന്തോഷ് ഈപ്പനും നല്കിയത്. ലൈഫ് മിഷന് കരാര് ലഭിക്കാന് 4.48 കോടി രൂപ കോഴ നല്കിയെന്നായിരുന്നു സന്തോഷ് ഈപ്പന്റെ വെളിപ്പെടുത്തല്