മുഖ്യമന്ത്രി അരവിന്ദ് കെജ്‌രിവാളിൻ്റെ മാതാപിതാക്കളെ ഡൽഹി പോലീസ് ഇന്ന് ചോദ്യം ചെയ്യും. രാവിലെ 11. 30ന് ചോദ്യം ചെയ്യൽ നടക്കുമെന്നാണ് ആം ആദ്മി പാർട്ടിയുമായി (എഎപി) ബന്ധപ്പെട്ട വൃത്തങ്ങൾ പറയുന്നത്. സ്വാതി മലിവാളിനെ ആക്രമിച്ച കേസിലാണ് ഈ അന്വേഷണം. സംഭവം നടക്കുമ്പോൾ കെജ്‌രിവാളിൻ്റെ മാതാപിതാക്കൾ വീട്ടിൽ ഉണ്ടായിരുന്നു എന്നതാണ് അന്വേഷണത്തിന് പിന്നിലെ കാരണം.
കേസിൽ വീട്ടിലുണ്ടായിരുന്ന എല്ലാവരുടെയും മൊഴി ഡൽഹി പോലീസ് രേഖപ്പെടുത്തിയേക്കും. അതേസമയം, വിഷയവുമായി ബന്ധപ്പെട്ട് എഎപി മേധാവിയുടെ ഭാര്യ സുനിത കെജ്‌രിവാളിനെയും ഡൽഹി പോലീസ് ചോദ്യം ചെയ്‌തേക്കുമെന്ന് വൃത്തങ്ങൾ അറിയിച്ചു.
കെജ്‌രിവാളിൻ്റെ പേഴ്‌സണൽ അസിസ്റ്റൻ്റ് ബിഭവ് കുമാർ മുഖ്യമന്ത്രിയുടെ വസതിയിൽ എത്തിയപ്പോൾ തന്നെ ആക്രമിച്ചുവെന്ന് സ്വാതി മലിവാൾ ആരോപിച്ചിരുന്നു. പിന്നാലെ വൻ രാഷ്ട്രീയ സംഘർഷം ഉടലെടുത്തത്. സംഭവത്തിൽ പോലീസ് കേസെടുത്ത് കുമാറിനെ അറസ്റ്റ് ചെയ്തു. ബിഭവ് കുമാർ ഒരു പ്രകോപനവുമില്ലാതെ തന്നെ ചീത്തവിളിക്കുകയും മോശമായി പെരുമാറുകയും ചെയ്തുവെന്ന് സ്വാതി പറഞ്ഞിരുന്നു.