അബുദാബി: യുഎഇയിലെ ഇന്ത്യൻ പൗരന്മാർ ജാഗ്രത പാലിക്കണമെന്ന് അബുദാബിയിലെ ഇന്ത്യൻ എംബസി അറിയിച്ചു. യുഎസ് സൈനികതാവളങ്ങൾ ലക്ഷ്യമാക്കി ഇറാൻ കനത്ത ആക്രമണം ആരംഭിച്ചതോടെ നിലവിലെ പ്രാദേശിക സാഹചര്യങ്ങൾ കണക്കിലെടുത്താണ് ഇന്ത്യൻ എംബസിയുടെ ജാഗ്രതാ നിർദ്ദേശം. അനാവശ്യ യാത്രകൾ ഒഴിവാക്കണമെന്നും സുരക്ഷാ കാര്യങ്ങളിൽ പ്രത്യേക ശ്രദ്ധ ചെലുത്തണമെന്നുമാണ് എംബസി നൽകുന്ന നിർദ്ദേശം. അബുദാബിയിലെ ഇന്ത്യൻ എംബസിയും ദുബായിലെ കോൺസുലേറ്റ് ജനറലും നിലവിൽ സാധാരണ രീതിയിൽ തന്നെ പ്രവർത്തിക്കുന്നുണ്ടെന്നും അറിയിച്ചിട്ടുണ്ട്.
അത്യാവശ്യമല്ലാത്ത യാത്രകൾ പൂർണ്ണമായും ഒഴിവാക്കുക, യുഎഇ അധികൃതരും ഇന്ത്യൻ എംബസിയും സമയാസമയങ്ങളിൽ പുറപ്പെടുവിക്കുന്ന സുരക്ഷാ മാർഗനിർദ്ദേശങ്ങൾ കൃത്യമായി പിന്തുടരുക. ചുറ്റുമുള്ള സാഹചര്യങ്ങളിൽ അതീവ ശ്രദ്ധ പുലർത്തി ജാഗ്രത പാലിക്കുക തുടങ്ങിയ നിർദ്ദേശങ്ങൾ ആണ് പുറപ്പെടുവിച്ചിട്ടുള്ളത്.
ഏതെങ്കിലും തരത്തിലുള്ള അടിയന്തര സഹായങ്ങൾക്കായി താഴെ പറയുന്ന നമ്പറുകളിലും ഇമെയിൽ വിലാസങ്ങളിലും ഇന്ത്യൻ പൗരന്മാർക്ക് ബന്ധപ്പെടാവുന്നതാണ്: ടോൾ ഫ്രീ നമ്പർ: 800-46342, വാട്സാപ്പ് (WhatsApp): +971 543090571, ഇമെയിൽ: [email protected], [email protected]