പാലക്കാട് വടക്കഞ്ചേരി ആയക്കാട്ടിൽ എ ഐ ക്യാമറ തകർത്ത വാഹനം കോതമംഗലത്ത് കണ്ടെത്തി. സംഭവത്തിനുശേഷം മൂന്നാർ പോകും വഴി തകർന്ന ചില്ല് മാറ്റാൻ കോതമംഗലത്ത് വർക്ക്ഷോപ്പിൽ എത്തിച്ച വാഹനമാണ് പൊലീസ് കണ്ടെത്തിയത്. സംഭവത്തിൽ പുതുക്കോട് മൈത്താക്കൽ വീട്ടിൽ മുഹമ്മദ് (22) നെ വടക്കഞ്ചേരി പൊലീസ് അറസ്റ്റ് ചെയ്തിരുന്നു. മുഹമ്മദാണ് വാഹനം ഓടിച്ചിരുന്നതെന്ന് പൊലീസ് പറഞ്ഞു. സംഭവത്തിൽ പ്രതിയായ മുഹമ്മദ് പുതുക്കോട് നിന്നും വാടകയ്ക്കെടുത്ത വാഹനമാണ് കണ്ടെത്തിയത്.
എ ഐ ക്യാമറ തകർത്ത വാഹനമായ ഇന്നോവയിൽ മൂന്നുപേർ ഉണ്ടായിരുന്നതായും ഇതിൽ രണ്ട് പേർ ഒളിവിൽ ആണെന്നും പോലീസ് പറഞ്ഞു. ക്യാമറയും പോസ്റ്റും സമീപത്തെ തെങ്ങിന്തോപ്പിലാണ് കണ്ടെത്തിയത്.
ആയക്കാട് സ്ഥാപിച്ച ക്യാമറയാണ് വ്യാഴാഴ്ച രാത്രി 11 മണിയോടുകൂടി തകർത്തത്.ക്യാമറ തകർക്കണമെന്ന ഉദ്ദേശത്തോടു ബോധപൂർവ്വം ഇടിച്ചതാണെന്ന് സി സി ടി വി ദ്യശ്യങ്ങളിൽ നിന്നും വ്യക്തമാണ്. ഇടിച്ചശേഷം വാഹനം നിർത്താതെ പോവുകയായിരുന്നു.