2026-ൻ്റെ രണ്ടാം പകുതിയോടെ ആപ്പിൾ തങ്ങളുടെ ആദ്യത്തെ ഫോൾഡബിൾ ഐഫോൺ വിപണിയിലിറക്കാൻ ഒരുങ്ങുകയാണ്. എന്നാൽ, ഇതിന് പിന്നാലെ മറ്റൊരു വ്യത്യസ്തമായ ഫോൾഡബിൾ ഫോണിന്റെ പണിപ്പുരയിലാണ് ആപ്പിൾ എന്നാണ് റിപ്പോർട്ടുകൾ സൂചിപ്പിക്കുന്നത്. പുസ്തകം പോലെ തുറക്കാവുന്ന ‘ഐഫോൺ ഫോൾഡിന്’ (iPhone Fold) പകരം, സാംസങ് ഗാലക്സി Z ഫ്ലിപ്പ് സീരീസിന് സമാനമായ രീതിയിലുള്ള ‘ഫ്ലിപ്പ്’ ഫോണായിരിക്കും ഇത്.
ബ്ലൂംബെർഗിന്റെ റിപ്പോർട്ട് പ്രകാരം, ക്ലാംഷെൽ (Clamshell) രീതിയിൽ മടക്കാവുന്ന ഒരു ഐഫോൺ ആപ്പിൾ തയ്യാറാക്കുന്നുണ്ട്. ഈ ഐഫോണിന് ഏകദേശം സാംസങ് ഗാലക്സി Z ഫ്ലിപ്പ് 7-ൻ്റെ അത്രയും വലിപ്പമുണ്ടാകും. വരാനിരിക്കുന്ന ഐഫോൺ ഫോൾഡിനെ കുറിച്ച് ആപ്പിളിന് ആത്മവിശ്വാസമുണ്ടെന്നും ഇത് കൂടുതൽ ഫോൾഡബിൾ ഐഫോണുകൾക്ക് ഡിമാൻഡ് സൃഷ്ടിക്കുമെന്ന് കമ്പനി വിശ്വസിക്കുന്നുവെന്നും റിപ്പോർട്ടിൽ പറയുന്നു.
സാധാരണ ഐഫോൺ ഫോൾഡ്, സാംസങ് ഗാലക്സി Z ഫോൾഡ് 7-നേക്കാളും ഗൂഗിൾ പിക്സൽ 10 പ്രോ ഫോൾഡിനേക്കാളും വലിപ്പം കുറഞ്ഞ ഒരു സവിശേഷ ഉപകരണമായിരിക്കും. എന്നാൽ ഫ്ലിപ്പ് ഐഫോൺ വിപണിയിലെ മറ്റ് ക്ലാംഷെൽ ഫോണുകൾക്ക് സമാനമായിരിക്കും.
ഗാലക്സി Z ഫ്ലിപ്പ് 7-നെ ഉദാഹരണമായി എടുത്താൽ, അത് മടക്കിവെക്കുമ്പോൾ 4.1 ഇഞ്ച് ഡിസ്പ്ലേയും തുറക്കുമ്പോൾ 6.9 ഇഞ്ച് ഡിസ്പ്ലേയുമാണുള്ളത്. ഏകദേശം ഇതേ മാതൃകയിലായിരിക്കും ആപ്പിളിന്റെ ഫ്ലിപ്പ് ഫോണും എത്തുക. ഇത് മടക്കി വെക്കുമ്പോൾ പോക്കറ്റിൽ എളുപ്പത്തിൽ ഒതുങ്ങുന്നതും തുറക്കുമ്പോൾ സാധാരണ ഐഫോൺ അനുഭവം നൽകുന്നതുമായിരിക്കും.
ആപ്പിൾ ഒരു ക്ലാംഷെൽ ഐഫോൺ പുറത്തിറക്കാൻ താൽപ്പര്യപ്പെടുന്നുണ്ടെന്ന് റിപ്പോർട്ട് സൂചിപ്പിക്കുന്നു. എന്നിരുന്നാലും, ഈ ഐഫോണിൻറെ റിലീസ് തീയതി സംബന്ധിച്ച് ഇപ്പോഴും പൂർണ്ണമായും ഉറപ്പായിട്ടില്ല. ആപ്പിൾ ഈ പ്രോജക്റ്റുമായി മുന്നോട്ട് പോകാൻ തീരുമാനിച്ചാൽ പോലും കുറഞ്ഞത് 2027 വരെ അത് വിൽപ്പനയ്ക്കെത്താൻ സാധ്യതയില്ല. നേരത്തെ മടക്കാവുന്ന ഐപാഡ് (Foldable iPad) പുറത്തിറക്കാൻ ആപ്പിൾ ശ്രമിച്ചിരുന്നെങ്കിലും നിർമ്മാണ സംബന്ധമായ ചില തടസ്സങ്ങൾ നേരിടുന്നതായാണ് റിപ്പോർട്ട്.
ഫോൾഡബിൾ ഫ്ലിപ്പ് ഐഫോണിൻ്റെ വിലയെക്കുറിച്ച് ഇപ്പോൾ ഔദ്യോഗിക വിവരങ്ങളൊന്നുമില്ല. എങ്കിലും, പുസ്തക രൂപത്തിൽ മടക്കാവുന്ന ഐഫോൺ ഫോൾഡിനേക്കാൾ വില കുറവായിരിക്കും ഇതിന്. 2026 സെപ്റ്റംബറിൽ പുറത്തിറങ്ങുമെന്ന് കരുതുന്ന ഐഫോൺ ഫോൾഡിന് അമേരിക്കയിലെ പ്രാരംഭ വില ഏകദേശം 2,400 ഡോളർ (ഏകദേശം 2,15,000 ഇന്ത്യൻ രൂപ) വില പ്രതീക്ഷിക്കുന്നുണ്ട്.