കേരളത്തിൽ അടുത്ത അഞ്ച് ദിവസം ഇടിമിന്നലോട് കൂടിയ മിതമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. കേരളത്തില് അടുത്ത അഞ്ചുദിവസം ഇടിമിന്നലോട് കൂടിയ മിതമായ മഴയ്ക്കും, ഒറ്റപ്പെട്ട സ്ഥലങ്ങളില് ഇന്ന് ശക്തമായ മഴയ്ക്കും സാധ്യതയെന്നും മുന്നറിയിപ്പ് നല്കിയിട്ടുണ്ട്. അറബിക്കടലില് ന്യൂനമര്ദ്ദം രൂപപ്പെട്ടതായും, വെള്ളിയാഴ്ചയോടെ മറ്റൊരു ന്യൂനമര്ദ്ദം രൂപപ്പെട്ടേക്കുമെന്നും ഇതിന്റെയെല്ലാം സ്വാധീനഫലമായി മഴ ശക്തമായേക്കുമെന്നുമാണ് കാലാവസ്ഥാ വകുപ്പ് അറിയിച്ചിരിക്കുന്നത്
തെക്ക് കിഴക്കന് അറബിക്കടലിനും ലക്ഷദ്വീപിനും മുകളിലായി സ്ഥിതി ചെയ്തിരുന്ന ചക്രവാതച്ചുഴിയാണ് ശക്തി പ്രാപിച്ച് തെക്ക് കിഴക്കന് അറബിക്കടലിനും മധ്യ കിഴക്കന് അറബിക്കടലിനും മുകളിലായി ന്യൂനമര്ദ്ദമായി മാറിയത്. അടുത്ത 24 മണിക്കൂറില് വടക്ക് പടിഞ്ഞാറ് ദിശയിലേക്ക് സഞ്ചരിച്ച് ശക്തി കൂടിയ ന്യൂനമര്ദമാവുകയും തുടര്ന്ന് ഒക്ടോബര് ഇരുപത്തൊന്നോടെ വീണ്ടും ശക്തി പ്രാപിച്ച് മധ്യ അറബിക്കടലില് തീവ്ര ന്യൂനമര്ദ്ദമായി മാറാന് സാധ്യതയെന്നും കാലാവസ്ഥ വകുപ്പ് അറിയിച്ചു.