ശക്തന്റെ തട്ടകത്തില് ഇന്ന് പുലികള് ഇറങ്ങും. ഓണാഘോഷത്തിന്റെ ഭാഗമായി നാലാം ഓണത്തിന് നടക്കുന്ന പുലികളിക്കായി തൃശ്ശൂര് നഗരം ഒരുങ്ങിക്കഴിഞ്ഞു. 300 ഓളം പുലികളാണ് സ്വരാജ് റൗണ്ടില് ചെണ്ടയുടെ താളത്തിന് ഒപ്പം നൃത്തം വച്ച് നഗരം കീഴടക്കുക. മൂന്ന് മണിക്ക് ശേഷം മുഖംമൂടി വെച്ച് അരമണികെട്ടി കാല്ത്തളയുമിട്ട് ഓരോ പുലികളും സ്വരാജ് റൗണ്ടിലെത്തും. മണിക്കൂറുകള് നീണ്ടു നില്ക്കുന്ന മത്സര കളികള്ക്കൊടുവില് വടക്കുംനാഥ ക്ഷേത്രത്തിന്റെ പടിഞ്ഞാറേ നടയിലെ നടുവിലാല് ഗണപതിക്ക് നാളികേരമുടക്കുന്നതോടെ ഇക്കൊല്ലത്തെ പുലിക്കളി അവസാനിക്കും.
അഞ്ച് ടീമുകളാണ് പുലികളെ അണിനിരത്തുന്നത്. വിയ്യൂര് ദേശത്ത് നിന്ന് പെണ്പുലികളും ഇറങ്ങും. ഓരോ ദേശക്കാര്ക്കും സ്വന്തമായി ടാബ്ലോയും പുലി വണ്ടിയുമുണ്ട്. ഓരോ ടീമുകളിലായി 51 പുലികള് ഉണ്ടാവും. ഇത്തവണ ശക്തന് പുലികളി ദേശം, കാനാട്ടുകര, അയ്യന്തോള്, വിയ്യൂര്, സീതാറാം മില് ലെയിന്, തുടങ്ങിയ ടീമുകളാണ് പുലികളെ അണിനിരത്തുന്നത്. കുറഞ്ഞത് 31 പുലികള് വേണമെന്നാണ് കോര്പറേഷന് മാനദണ്ഡം. കരിമ്പുലി,വരയന് പുലി, പുള്ളിപ്പുലി ഫ്ലൂറസന്റ് പുലി തുടങ്ങി പലവിധ പുലികള് നഗരത്തില് ഇറങ്ങും.
പുലിക്കളിയോടനുബന്ധിച്ച് ഉച്ചയ്ക്ക് 12 മുതല് തൃശ്ശൂര് നഗരത്തിലും പരിസര പ്രദേശങ്ങളിലും ഗതാഗത നിയന്ത്രണം ഏര്പ്പെടുത്തും. സ്വകാര്യ വാഹനങ്ങള് അത്യാവശ്യത്തിന് അല്ലാതെ നഗരത്തിലേക്ക് വരുന്നത് ഒഴിവാക്കണമെന്നാണ് നിര്ദ്ദേശം. കൂടാതെ സ്വരാജ് റൗണ്ടിലും സമീപ റോഡുകളിലും പാര്ക്കിങ് വിലക്കിയിട്ടുണ്ട്. വിദേശികള് അടക്കം ആയിരങ്ങളെ സാക്ഷിയാക്കി നഗരം പുലികള് കയ്യടക്കാന് ഇനി മണിക്കൂറുകള് മാത്രമാണ് ബാക്കിയുള്ളത്.