കൊച്ചി: ഒമ്പതാം സീസണിന്റെ ഉദ്ഘാടന മത്സരത്തില് ഈസ്റ്റ് ബംഗാളിനെ ഒന്നിനെതിരെ മൂന്ന് ഗോളുകള്ക്ക് ആണ് കേരളാ ബ്ലാസ്റ്റേഴ്സ് തോൽപ്പിച്ചത്. ഗോള്രഹിതമായ ആദ്യ പകുതിക്ക് ശേഷം ഹര്മന്ജോത് ഖബ്രയുടെ ഓവര്ഹെഡ് പാസില് 72-ാം മിനിറ്റില് അഡ്രിയാന് ലൂണയിലൂടെയാണ് ബ്ലാസ്റ്റേഴ്സ് മുന്നിലെത്തിയത്. ജയത്തോടെ ആദ്യ ഗോളടിച്ചശേഷം കോച്ച് ഇവാന് വുകാമനോവിച്ചിന് കീഴില് തോറ്റിട്ടില്ലെന്ന റെക്കോര്ഡ് ബ്ലാസ്റ്റേഴ്സ് നിലനിര്ത്തി.
82ാം മിനിറ്റില് പകരക്കാരനായി ഇറങ്ങിയ ഇവാന് കലീഷ്ണൂയിയിലൂടെ ബ്ലാസ്റ്റേഴ്സ് ലീഡുയര്ത്തി. 87ാം മിനിറ്റില് അലക്സ് ലിമയിലൂടെ ഈസ്റ്റ് ബംഗാള് ഒരു ഗോള് മടക്കിയെങ്കിലും രണ്ട് മിനിറ്റിനകം യുക്രൈന് മിസൈലിനെ അനുസ്മരിപ്പിക്കുന്ന ലോംഗ് റേഞ്ചറിലൂടെ കലീഷ്ണൂയി ബ്ലാസ്റ്റേഴ്സിന്റെ ജയമുറപ്പിച്ച മൂന്നാം ഗോള് നേടി. ആദ്യ പകുതിയില് ഇരു ടീമുകള്ക്കും നിരവധി അവസരങ്ങള് ലഭിച്ചെങ്കിലും അതൊന്നും ഗോളാക്കി മാറ്റാനായില്ല.സീസണിലെ ആദ്യ പോരില് കോച്ച് ഇവാന് വുകാമനോവിച്ച് 4-4-2 ശൈലിയിലാണ് ടീമിനെ കളത്തിലിറക്കിയത്.