പാലക്കാട്: മണ്ണാർക്കാട് മേക്കളപാറ പ്രദേശത്തെ വീട്ടുപരിസരത്തുള്ള കോഴിക്കൂടിനുള്ളിൽ അകപ്പെട്ട പുള്ളിപ്പുലിയെ ചത്ത നിലയിൽ കണ്ടെത്തി. പുലർച്ചെ ഒന്നരയോടു കൂടിയാണ് പുലിയുടെ കൈ കോഴിക്കൂട്ടിനുള്ളിൽ അകപ്പെട്ടത്. വീട്ടുകാർ ഫോറസ്റ്റ് ഉദ്യോഗസ്ഥരെ വിവരം അറിയിച്ചതിനെതുടർന്ന് ഉദ്യോഗസ്ഥർ സംഭവസ്ഥലത്തെത്തി. കൈ കൂടിനുള്ളിൽ അകപ്പെട്ടത് കാരണം മണിക്കൂറുകളോളം പുലി നിൽക്കുകയായിരുന്നു. കൂടിന് ചുറ്റും ഉദ്യോഗസ്ഥർ വല കെട്ടി സുരക്ഷ ഒരുക്കി. സമീപത്തു നിന്നും ഉദ്യോഗസ്ഥർ ജനങ്ങളെ ഒഴിപ്പിച്ചു. മയക്ക് വെടിവെച്ച് പുലിയെ പിടികൂടാനുള്ള തീരുമാനത്തിനിടെയാണ് പുലിയെ ചത്തനിലയിൽ കണ്ടെത്തിയത്. ഹൃദയാഘാതം കാരണമാണ് പുലി ചത്തതെന്നാണ് പോസ്റ്റ്മോർട്ടം റിപ്പോർട്ട്. പ്രദേശത്ത് കടുവ, പുലി, പോത്ത്, ആന എന്നിവയുടെ ശല്യം സ്ഥിരമായി ഉണ്ടെന്നും ഇവിടെ ജീവിക്കാൻ പറ്റാത്ത അവസ്ഥയാണെന്നും നാട്ടുകാർ ആരോപിച്ചു.
