മാനനഷ്ടക്കേസില് ശിക്ഷിക്കപ്പെട്ടതിന് പിന്നാലെ രാഹുല് ഗാന്ധിയെ ലോക്സഭാ എംപി സ്ഥാനത്ത് നിന്ന് അയോഗ്യനാക്കി. ലോക്സഭാ സെക്രട്ടേറിയേറ്റ് ആണ് രാഹുല് ഗാന്ധിയെ അയോഗ്യനാക്കി വിജ്ഞാപനം പുറത്തിറക്കിയിരിക്കുന്നത്. ഇതുമായി ബന്ധപ്പെട്ട കോടതി ഉത്തരവ് പുറത്തുവന്ന വ്യാഴാഴ്ച മുതൽ അയോഗ്യനാക്കിയ തീരുമാനം പ്രാബല്യത്തിലായെന്നാണ് അറിയിച്ചിരിക്കുന്നത്. ഇതോടെ വയനാട് ലോക്സഭാ സീറ്റിൽ നിന്നുള്ള എംപി സ്ഥാനം രാഹുൽ ഗാന്ധിക്ക് നഷ്ടമായി. മേൽകോടതിയിൽ നിന്ന് സ്റ്റേ കിട്ടിയില്ലെങ്കിൽ 6 വർഷത്തേക്ക് മത്സരിക്കാനും സാധിക്കില്ല. നിയമോപദേശം ലഭിച്ചതിന്റെ അടിസ്ഥാനത്തിലാണ് നടപടിയെന്നാണ് വിവരം. കഴിഞ്ഞ ദിവസമാണ് മാനനഷ്ടക്കേസില് രാഹുല് ഗാന്ധി കുറ്റക്കാരനെന്ന് സൂറത്ത് കോടതി വിധിച്ചത്.
വിവാദങ്ങള്ക്കിടെ രാഹുല് ഗാന്ധി ഇന്ന് സഭയിലെത്തിയിരുന്നു. ഇതേത്തുടര്ന്ന് പാര്ലമെന്റ് പ്രക്ഷ്ഭുതമായതിന് പിന്നാലെയാണ് ലോക്സഭ നിര്ണായകമായ ഉത്തരവ് പുറത്തിറക്കിയിരുന്നത്. ലോക്സഭ നോട്ടീസില് ഇങ്ങനെ പറയുന്നു – ‘സിസി/ 18712/2019 കേസില് സൂറത്തിലെ ചീഫ് ജുഡീഷ്യല് മജിസ്ട്രേറ്റ് കോടതി ശിക്ഷിച്ചതിന്റെ ഫലമായി, കേരളത്തിലെ വയനാട് പാര്ലമെന്റ് മണ്ഡലത്തെ പ്രതിനിധീകരിക്കുന്ന ലോക്സഭാംഗമായ രാഹുല് ഗാന്ധിയെ, ശിക്ഷിക്കപ്പെട്ട ദിവസം മുതല് ലോക്സഭാംഗത്വത്തില് നിന്ന് അയോഗ്യനാക്കി.
2019ലെ ലോക്സഭാ തെരഞ്ഞെടുപ്പിനിടെ കർണാടകയിലെ കോലാറിൽ വച്ച് മോദി സമുദായത്തിനെതിരെ രാഹുല് ഗാന്ധി നടത്തിയ പ്രസംഗമാണ് കേസിനാധാരം. കള്ളൻമാരുടെ പേരിനൊപ്പം മോദിയെന്ന് വരുന്നത് എന്തുകൊണ്ടാണെന്നാണ് രാഹുൽ ഗാന്ധി പ്രസംഗത്തില് ചോദിച്ചത്. നീരവ് മോദി, ലളിത് മോദി, നരേന്ദ്ര മോദി… ഇവരുടെയെല്ലാം പേരിനൊപ്പം മോദി വന്നത് എങ്ങനെയാണ്? എല്ലാ കള്ളന്മാരുടെയും പേരിനൊപ്പം മോദി എങ്ങനെ വന്നു? ഇനിയും തിരഞ്ഞാല് കൂടുതല് മോദിമാരുടെ പേരുകള് പുറത്തുവരും’. കഴിഞ്ഞ ലോക്സഭാ തിരഞ്ഞെടുപ്പ് പ്രചാരണ വേളയില് കര്ണാടകയിലെ തിരഞ്ഞെടുപ്പ് പ്രചാരണ റാലിയില് നടത്തിയ ഈ പരാമര്ശമാണ് കോണ്ഗ്രസ് നേതാവും എംപിയുമായ രാഹുലിന് വിനയായത്. രാഹുലിന്റെ പരാമര്ശം തനിക്ക് വ്യക്തിപരമായി മാനഹാനിയുണ്ടായെന്നും മോദി സമുദായത്തിലുള്ള എല്ലാവരേയും അപമാനിക്കുന്നതാണെന്നും കാണിച്ച് ബിജെപി നേതാവും സൂറത്ത് വെസ്റ്റ് മണ്ഡലത്തില് നിന്നുള്ള ബിജെപി എംഎല്എയുമായ പൂര്ണേഷ് മോദി മാനനഷ്ടക്കേസ് ഫയല് ചെയ്തതോടെ സംഭവം ഗൗരവമേറിയതായി. തുടര്ന്ന് രാഹുലിനെ ഉള്പ്പെടെ വിളിച്ചുവരുത്തി കോടതി കേസില് വാദം കേട്ടു. മൂന്ന് തവണ രാഹുല് കോടതിയില് നേരിട്ട് ഹാജരായി.
തന്റെ ഭാഗത്ത് തെറ്റില്ലെന്ന് പറഞ്ഞ് പ്രസംഗത്തെ ന്യായീകരിച്ചായിരുന്നു രാഹുലിന്റെ മൊഴി. സന്ദര്ഭത്തില്നിന്ന് അടര്ത്തിമാറ്റി വാക്കുകള് തെറ്റായി വ്യാഖ്യാനിച്ചതാണെന്നും പൂര്ണേഷ് മോദിയെ ലക്ഷ്യവച്ചല്ല പ്രസംഗിച്ചതെന്നും പ്രധാനമന്ത്രിയെ ഉദ്ദേശിച്ചായിരുന്നു തന്റെ പരാമര്ശമെന്നും രാഹുല് കോടതിയില് വാദിച്ചു. എന്നാല് രാഹുലിന്റെ ഈ വാദമൊന്നും കോടതിയില് വിലപ്പോയില്ല.