ദില്ലി : സുരക്ഷാവീഴ്ചയുടെ പേരിൽ താൽക്കാലികമായി നിർത്തിവച്ച ഭാരത് ജോഡോ യാത്ര വീണ്ടും തുടങ്ങി. അവന്തിപോരയിലെ ചുർസൂ ഗ്രാമത്തിൽ നിന്നും ഇന്നലെ 9 മണിക്കാണ് യാത്ര ആരംഭിച്ചത് . ഉച്ചയ്ക്ക് ശേഷം യാത്ര ഉണ്ടാകില്ലെന്നും പന്താര ചൗക്കിൽ ഉച്ചയോടെ യാത്ര അവസാനിപ്പിക്കുമെന്നും കോൺഗ്രസ് അറിയിച്ചു.
അതേസമയം സുരക്ഷാ വീഴ്ചയെ തുടർന്ന് ജോഡോ യാത്ര നിർത്തിവച്ചതുമായി ബന്ധപ്പെട്ട് പോലീസിന്റെ ഭാഗത്തുനിന്നും സുരക്ഷാ വീഴ്ച ഉണ്ടായിട്ടില്ല എന്ന് ജമ്മു കാശ്മീർ പോലീസ് പ്രതികരിച്ചു. ആൾക്കൂട്ടത്തെ കൂടുതലായി യാത്രയിൽ ഉൾപ്പെടുത്തുന്ന കാര്യം നേരത്തെ പോലീസിൽ അറിയിച്ചില്ലെന്നും ഇതു സംബന്ധിച്ച ചർച്ച നടന്നില്ലെന്നും ജമ്മു പോലീസ് പറഞ്ഞു.
എന്നാൽ ജോഡോ യാത്രയുടെ സുരക്ഷ പിൻവലിച്ച നടപടിയിൽ പ്രതിഷേധിച്ചും ജോഡോ യാത്രയ്ക്കും രാഹുൽ ഗാന്ധിക്കും ഐക്യദാർഢ്യം പ്രഖ്യാപിച്ചും സംസ്ഥാനത്തുടനീളം കെപിസിസിയുടെ പൊതുസമ്മേളന പരിപാടി സംഘടിപ്പിക്കും.