മുംബൈ: മഹാരാഷ്ട്രയിൽ ട്രക്കും കാറുമായി കൂട്ടിയിടിച്ചുണ്ടായ അപകടത്തിൽ 9 പേർ മരിച്ചു. മഹാരാഷ്ട്രയിലെ റായ്ഗഡ് ജില്ലയിൽ ഇന്ന് പുലർച്ചെ 4. 45 ഓടെയാണ് അപകടമുണ്ടായത്. ഗോവ- മുംബൈ ഹൈവേയിൽ വാഹനങ്ങൾ നേർക്കുനേർ കൂട്ടിയിടിക്കുകയായിരുന്നു. അപകടത്തിൽ അഞ്ചു പുരുഷന്മാരും മൂന്നു സ്ത്രീകളും ഒരു പെൺകുട്ടിയും ആണ് മരണമടഞ്ഞത്.
മുംബൈ ഭാഗത്തേക്ക് പോയ ട്രക്കും രത്നഗിരിയിലേക്ക് വന്ന കാറുമാണ് കൂട്ടിയിടിച്ച് അപകടം ഉണ്ടായത്. അപകടത്തിൽപ്പെട്ട കാർ പൂർണമായും തകർന്ന അവസ്ഥയിലാണ്. അപകടത്തെ തുടർന്ന് മണിക്കൂറുകളോളം റോഡിൽ ഗതാഗത തടസ്സം നേരിട്ടു. അപകടത്തിൽ ട്രക്കിന്റെ മുൻഭാഗവും തകർന്നിട്ടുണ്ട്. ഗുരുതരമായി പരിക്കേറ്റ് 5 വയസ്സുകാരിയെ ആശുപത്രിയിൽ പ്രവേശിപ്പിച്ചതായി പോലീസ് അറിയിച്ചു.