ദുബൈയുടെ വാണിജ്യ വ്യാപാര വിനോദ മേഖലക്ക് ഉണർവ്വേകി കഴിഞ്ഞ 45 ദിവസം നടന്നിരുന്ന ദുബായ് ഷോപ്പിംഗ് ഫെസ്റ്റിവലിന് ഇന്ന് സമാപനമാവും. ഉപഭോക്താക്കൾക്ക് 10ലക്ഷം ദിർഹം, ഒരു കിലോ സ്വർണം, ഡൗൺടൗൺ ദുബൈയിൽ അപാർട്ട്മെന്റ് തുടങ്ങി നിരവധി സമ്മാനങ്ങൾ ഇത്തവണ ഒരുക്കിയിരുന്നു.ആകെ സമ്മാനങ്ങളുടെ മൂല്യം നാലു കോടി ദിർഹം വരും. യു.എ.ഇ സർക്കാർ ആരംഭിച്ച ‘ലോകത്തിലെ ഏറ്റവും മനോഹരമായ ശൈത്യകാലം’ എന്ന തലക്കെട്ടിലെ ടൂറിസം കാമ്പയിനിലേക്ക് സന്ദർകരെ ആസ്വദിക്കാനും വിവിധ പരിപാടികൾ സംഘടിപ്പിച്ചിരുന്നു.
ഡി.എസ്.എഫിന്റെ 28ാം സീസൺ അവസാനിക്കുമ്പോൾ സന്ദർശകർക്കും സ്വദേശികൾക്കും ലോകോത്തര ഷോപ്പിങ് അനുഭവം പകർന്നാണ് ദുബൈ ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്മെന്റിന്റെ (ഡി.എഫ്.ആർ.ഇ) നേതൃത്വത്തിൽ വ്യാപാരമേളക്ക് കൊടിയിറങ്ങുന്നത്. 25 ശതമാനം മുതൽ 90 ശതമാനം വരെ വിളിക്കിഴിവും കഴിഞ്ഞ മൂന്ന് ദിവസങ്ങളിൽ ഫെസ്റ്റിവലിന്റെ അവസാനവിപണനം എന്ന രീതിയിൽ ഏർപ്പെടുത്തിയിരുന്നു. നഗരത്തിലുടനീളം 2,000ലധികം സ്റ്റോറുകളിൽ 500ലധികം ബ്രാൻഡുകൾക്ക് വിലക്കുറവ് ലഭ്യമാക്കിയിരുന്നു. റീട്ടെയിൽ ഔട്ട്ലെറ്റുകളിൽ 90 ശതമാനം വരെ കിഴിവും പ്രത്യേക ഓഫറുകളും ഡിസ്കൗണ്ടുകളും ഒരുക്കി. പുതുവത്സരം, ക്രിസ്മസ് തുടങ്ങിയ ആഘോഷ ദിനങ്ങളിലാണ് ഷോപ്പിങ് ഫെസ്റ്റിന്റെ ഭാഗമായി ഏറ്റവും കൂടുതൽ കച്ചവടം നടന്നത്. ഡി.എസ്.എഫിന്റെ ഭാഗമായ സ്ഥാപനങ്ങളിൽ ഈ ദിവസങ്ങളിൽ കച്ചവടം വർധിച്ചിരുന്നു. മലയാളികളുടെ അടക്കം സ്ഥാപനങ്ങളിൽ നിന്ന് നിരവധി സ്വർണ സമ്മാനങ്ങളാണ് ഈ കാലയളവിൽ പ്രവാസികൾ സ്വന്തമാക്കിയത്.
ലോകമെമ്പാടുമുള്ള സന്ദർശകർക്ക് ദുബൈ സന്ദർശിക്കാനും മികച്ച ഷോപ്പിങിന് നടത്താനും ഉള്ള അവസരത്തിന് പുറമെ നഗരത്തിലുടനീളം വ്യത്യസ്ത വിനോദ പരിപാടികല്യൂജെ ഇക്കുറി ഉണ്ടായിരുന്നു. വെടിക്കെട്ട്, ലൈറ്റ് ഫെസ്റ്റ്, സംഗീതകച്ചേരികൾ,തുടങ്ങിയവയും ഷോപ്പിങ് ഡീലുകൾ, ഹോട്ടൽ ഓഫറുകൾ, നറുക്കെടുപ്പുകൾ എന്നിവ ഉൾപ്പെടെ അരങ്ങേറിയിരുന്നു. ഇത്തവണ ഡ്രോൺ ലൈറ്റ് ഷോയും നടന്നു. മികച്ച ഷോപ്പിംഗ് അനുഭവങ്ങളുമായാണ് ഇത്തവണത്തെ ദുബായ് ഷോപ്പിങ് ഫെസ്റിവലിന് സമാപനം ആവുന്നത്.