സുരേഷ് ഗോപിയുടെ തെരഞ്ഞെടുപ്പ് ചോദ്യം ചെയ്തുള്ള ഹര്ജി ഹൈക്കോടതി തള്ളി. തൃശൂരിലെ സ്വതന്ത്ര സ്ഥാനാര്ത്ഥിയായിരുന്ന ജോഷി വില്ലടം നല്കിയ ഹര്ജിയാണ് തള്ളിയത്. ഹര്ജി നിലനില്ക്കില്ലെന്ന സുരേഷ് ഗോപിയുടെ വാദം അംഗീകരിച്ചു കൊണ്ടാണ് ഹർജി തള്ളിയത്. 1951-ലെ ജനപ്രാതിനിധ്യ നിയമത്തിലെ സെക്ഷൻ 123 പ്രകാരം സുരേഷ് ഗോപിയും അദ്ദേഹത്തിന്റെ തിരഞ്ഞെടുപ്പ് ഏജന്റും കൂടെയുള്ളവരും അഴിമതി നടത്തിയതായി വില്ലടം നൽകിയ ഹർജിയിൽ ആരോപിക്കുന്നു.
ഹർജി നിലനിൽക്കില്ലെന്ന് സുരേഷ് ഗോപി വാദിച്ചിരുന്നു. ഈ വാദമാണ് ജസ്റ്റിസ് കൗസർ എടഗപത്തിന്റെ ബെഞ്ച് അംഗീകരിച്ചത്. അതേസമയം മതചിഹ്നം ഉപയോഗിച്ച് സുരേഷ് ഗോപി വോട്ട് തേടിയെന്ന ഹർജി ഇപ്പോഴും ഹൈക്കോടതിയിൽ നിലനിൽക്കുന്നുണ്ട്. തൃശൂരിലെ ഒരു വോട്ടറാണ് ഈ ഹർജി നൽകിയത്. ഈ ഹർജി നിലനിൽക്കുമെന്ന് നേരത്തെ തന്നെ ഹൈക്കോടതി വ്യക്തമാക്കിയിരുന്നു.
ഇന്ത്യയിലെ തിരഞ്ഞെടുപ്പുകളിൽ ‘അഴിമതി പ്രവൃത്തികൾ’ എന്ന് കണക്കാക്കപ്പെടുന്ന വിവിധ വിഷയങ്ങളെ സെക്ഷൻ 123 നിർവചിക്കുന്നു. കൈക്കൂലി, അനാവശ്യ സ്വാധീനം ചെലുത്താൻ, മതം, ജാതി, ഭാഷ എന്നിവയുടെ അടിസ്ഥാനത്തിൽ വിവിധ വിഭാഗത്തിലുള്ള പൗരന്മാർക്കിടയിൽ ശത്രുത വളർത്തൽ, വോട്ട് അഭ്യർത്ഥിക്കാൻ മതപരമായ അഭ്യർത്ഥനകൾ ഉപയോഗിക്കൽ എന്നിവ ഇതിൽ ഉൾപ്പെടുന്നു.