അമേരിക്ക- ഇസ്രായേൽ- ഇറാൻ സംഘർഷം അയവില്ലാതെ തുടരുമ്പോൾ ഇറാനിയൻ ആക്രമണങ്ങൾ അയൽ രാജ്യമായ യുഎഇയിലും തുടരുകയാണ്. സംഘർഷം ആരംഭിച്ചതിനുശേഷം രാജ്യത്തേക്ക് വിക്ഷേപിച്ച 186 ബാലിസ്റ്റിക് മിസൈലുകളെ നേരിട്ടുവെന്നും ഇതിൽ 172 എണ്ണം നശിപ്പിക്കപ്പെട്ടുവെന്നും 13 എണ്ണം കടലിൽ വീണുവെന്നും പ്രതിരോധ മന്ത്രാലയം ഇന്ന് നടത്തിയ മാധ്യമസമ്മേളനത്തിൽ പറഞ്ഞു.
ഒരു ബാലിസ്റ്റിക് മിസൈൽ യുഎഇ പ്രദേശത്ത് പതിച്ചുവെന്നും 8 ക്രൂയിസ് മിസൈലുകൾ കണ്ടെത്തി നശിപ്പിക്കുകയും ചെയ്തു. 812 ഇറാനിയൻ ഡ്രോണുകൾ കണ്ടെത്തിയതായും അതിൽ 755 എണ്ണം തടഞ്ഞുനിർത്തുകയും 57 എണ്ണം യുഎഇ പ്രദേശത്തിനുള്ളിൽ പതിക്കുകയും ചെയ്തു. ഈ സംഭവങ്ങളിലായി ചില നാശനഷ്ടങ്ങൾ, മൂന്ന് മരണങ്ങൾ, 68 പേർക്ക് ചെറിയ പരിക്കുകൾ എന്നിവയുണ്ടായി, കൂടാതെ നിരവധി സിവിലിയൻ സ്വത്തുക്കൾക്ക് മിതമായ ഭൗതിക നാശനഷ്ടങ്ങൾ മാത്രമേ ഉണ്ടായിട്ടുള്ളൂ എന്നും സർക്കാർ പ്രതിനിധികൾ പറഞ്ഞു.
സംഘർഷം എത്രനാൾ തുടർന്നാലും വ്യോമാതിർത്തി മുഴുവൻ പ്രതിരോധിക്കാൻ കഴിയുന്ന ഒന്നിലധികം സംവിധാനങ്ങൾ രാജ്യത്തുണ്ടെന്ന് പ്രതിരോധ മന്ത്രാലയത്തിന്റെ ഔദ്യോഗിക വക്താവ് ബ്രിഗേഡിയർ സ്റ്റാഫ് പൈലറ്റ് അബ്ദുൾനാസിർ അൽഹമീദി പറഞ്ഞു.