സംസ്ഥാനത്തിന്റെ ഔദ്യോഗിക പേര് ‘കേരള’എന്നതുമാറ്റി ‘കേരളം’ എന്നാക്കുന്നതിന് കേന്ദ്ര മന്ത്രിസഭ അംഗീകാരം നൽകി. ബില്ല് രാഷ്ട്രപതി കേരള നിയമസഭയ്ക്ക് അയയ്ക്കും. നിയമസഭയുടെ അഭിപ്രായം തേടിയശേഷം കേന്ദ്രം തുടർനടപടി സ്വീകരിക്കും. പാർലമെന്റും ബിൽ പാസാക്കണം.
കേരള നിയമസഭ ഇതിനകം കേരളം എന്ന് പുനർനാമകരണം ചെയ്യാനുള്ള പ്രമേയം പാസാക്കിയിട്ടുണ്ട്. നിയമസഭാ തിരഞ്ഞെടുപ്പിന് മുന്നോടിയായാണ് കേന്ദ്ര സർക്കാരിന്റെ പ്രധാന തീരുമാനം. സംസ്ഥാനത്തിന്റെ ഔദ്യോഗിക പേര് ‘കേരള’ എന്നതുമാറ്റി ‘കേരളം’ എന്നാക്കാന് കേന്ദ്ര സര്ക്കാരിനോട് അഭ്യര്ഥിക്കുന്ന പ്രമേയം 2023ൽ മുഖ്യമന്ത്രി പിണറായി വിജയൻ നിയമസഭയിൽ അവതരിപ്പിച്ചിരുന്നു. പിന്നീട് കത്തിലൂടെയും ആവശ്യം ഉന്നയിച്ചു. ഭരണഘടനയുടെ എട്ടാം പട്ടികയില് പറയുന്ന എല്ലാ ഭാഷകളിലും കേരളം എന്നു പേര് ആക്കണമെന്നാണ് പ്രമേയത്തിൽ പറഞ്ഞിരുന്നത്. മുഖ്യമന്ത്രി പിണറായി വിജയൻ അവതരിപ്പിച്ച പ്രമേയം ഭേദഗതികൾ ഇല്ലാതെ പ്രതിപക്ഷം അംഗീകരിക്കുകയായിരുന്നു.
കേരള മുഖ്യമന്ത്രി പിണറായി വിജയൻ അവതരിപ്പിച്ച പ്രമേയത്തിലെ വിശദാംശങ്ങൾ ഇങ്ങനെ: “നമ്മുടെ സംസ്ഥാനത്തിന്റെ പേര് മലയാളത്തിൽ കേരളം എന്നാണ്.എന്നിരുന്നാലും, ഭരണഘടനയുടെ ആദ്യ ഷെഡ്യൂളിൽ നമ്മുടെ സംസ്ഥാനത്തിന്റെ പേര് കേരള എന്നാണ് എഴുതിയിരിക്കുന്നത്. സംസ്ഥാനത്തിന്റെ പേര് കേരളം എന്ന് മാറ്റുന്നതിന് ഭരണഘടനയുടെ ആർട്ടിക്കിൾ 3 പ്രകാരം അടിയന്തര നടപടികൾ സ്വീകരിക്കണമെന്ന് ഈ അസംബ്ലി ഏകകണ്ഠമായി കേന്ദ്രസർക്കാരിനോട് അഭ്യർത്ഥിച്ചു.
2023 ഓഗസ്റ്റ് ഒമ്പതിനും സമാനമായ പ്രമേയം പാസാക്കിയിരുന്നു. ചില സാങ്കേതിക പ്രശ്നങ്ങൾ കാരണമാണ് ഇത് വീണ്ടും പാസ്സാക്കുന്നതെന്ന് മുഖ്യമന്ത്രി പറഞ്ഞു. മുൻ പ്രമേയം ഭരണഘടനയുടെ ഒന്നാം ഷെഡ്യൂളിൽ (വിവിധ സംസ്ഥാനങ്ങളുടെ പട്ടിക) ഭേദഗതികൾ ആവശ്യപ്പെട്ടിരുന്നു. എട്ടാം ഷെഡ്യൂളിൽ (ഔദ്യോഗിക ഭാഷകളുടെ പട്ടിക) ഭേദഗതി ആവശ്യപ്പെടുക എന്നതാണ് ഇതിനർത്ഥം. എന്നാൽ കൂടുതൽ പരിശോധനയിൽ, വാചകത്തിൽ അവസാനത്തെ ആവശ്യം ഉൾപ്പെടുത്തിയിട്ടില്ലെന്ന് മനസ്സിലായി. അതിനാലാണ് പ്രമേയം പരിഷ്കരിച്ച് വീണ്ടും അവതരിപ്പിച്ചതെന്നും മുഖ്യമന്ത്രി നിയമസഭയിൽ പറഞ്ഞു.