ശബരിമല ശ്രീകോവിലിലെ സ്വർണ്ണപ്പാളികൾ മോഷ്ടിക്കപ്പെട്ടതുമായി ബന്ധപ്പെട്ട കേസിൽ അന്വേഷണം ശക്തമാക്കി പ്രത്യേക അന്വേഷണ സംഘം. കേസിന്റെ പുരോഗതി റിപ്പോർട്ട് എസ്.ഐ.ടി ഇന്ന് ഹൈക്കോടതിയിൽ സമർപ്പിച്ചു. ശബരിമലയിലെ വഴിപാടുകളിൽ നടക്കുന്ന ക്രമക്കേടുകളിൽ തിരുവിതാംകൂർ ദേവസ്വം ബോർഡിനെതിരെ രൂക്ഷ വിമർശനവുമായി ഹൈക്കോടതി രംഗത്തുവന്നു. ദേവസ്വം ബോർഡിന്റെ നടപടിക്രമങ്ങൾ, മേൽനോട്ടം, സ്റ്റോക്ക് അക്കൗണ്ടിംഗ്, സാമ്പത്തിക നിയന്ത്രണം എന്നിവയിൽ ആഴത്തിൽ വേരൂന്നിയ വ്യവസ്ഥാപരമായ കുറവുകളുണ്ടെന്ന് കേരള ഹൈക്കോടതി നിരീക്ഷിച്ചു. ബോർഡിന്റെ വരുമാനം സുരക്ഷിതമാക്കാനും അത് ചോർച്ചയോ മോഷണമോ ദുരുപയോഗമോ വഴി നഷ്ടപ്പെടാതിരിക്കാനും സമഗ്രവും സുതാര്യവും ഉത്തരവാദിത്തമുള്ളതുമായ സംവിധാനം കൊണ്ടുവരാൻ സമയം അതിക്രമിച്ചിരിക്കുന്നുവെന്ന് കോടതി വ്യക്തമാക്കി.
പ്രതികളുടെ ഫോൺ വിവരങ്ങൾ കൈമാറുന്നതിൽ കാലതാമസം വരുത്തരുതെന്ന് മൊബൈൽ കമ്പനികൾക്ക് കോടതി കർശന നിർദ്ദേശം നൽകി. വിവരങ്ങൾ നൽകാൻ കമ്പനികൾ സഹകരിക്കാത്തത് അന്വേഷണത്തെ ബാധിക്കുന്നുവെന്ന് എസ്.ഐ.ടി അറിയിച്ചതിനെ തുടർന്നാണ് ജസ്റ്റിസുമാരായ വി. രാജ വിജയരാഘവൻ, കെ.വി. ജയകുമാർ എന്നിവരടങ്ങിയ ബെഞ്ചിന്റെ ഇടപെടൽ. നിലവിൽ അടച്ചിട്ട മുറിയിലാണ് കേസിന്റെ വാദം പുരോഗമിക്കുന്നത്. ശ്രീകോവിലിൽ നിന്ന് ശേഖരിച്ച സ്വർണ്ണപ്പാളികളുടെ സാമ്പിളുകൾ വിദഗ്ധ പരിശോധനയ്ക്കായി ജംഷഡ്പൂരിലെ ലാബിലേക്ക് അയക്കാനും അന്വേഷണ സംഘം തീരുമാനിച്ചിട്ടുണ്ട്. സ്വർണ്ണത്തിന്റെ അളവിലും തൂക്കത്തിലും വന്ന മാറ്റങ്ങൾ ശാസ്ത്രീയമായി തെളിയിക്കാനാണ് ഈ നീക്കം. ഇതിനിടെ, ശബരിമല കൊടിമര പുനഃപ്രതിഷ്ഠയുമായി ബന്ധപ്പെട്ട ക്രമക്കേടുകളിൽ ഡിവൈഎസ്പി തലത്തിലുള്ള വിജിലൻസ് അന്വേഷണം തുടങ്ങിയതായി സർക്കാർ കോടതിയെ അറിയിച്ചു. മുപ്പത് ദിവസത്തിനകം അന്വേഷണം പൂർത്തിയാക്കി റിപ്പോർട്ട് നൽകാനാണ് ഹൈക്കോടതിയുടെ ഉത്തരവ്.
ശബരിമലയിലെ അയ്യപ്പ ക്ഷേത്രത്തിലെ അടിയശിഷ്ടം നെയ്യിന്റെ വിൽപനയുമായി ബന്ധപ്പെട്ട് ദേവസ്വം ബോർഡിന്റെ ജീവനക്കാർ ഫണ്ട് ദുരുപയോഗം ചെയ്തതായി ആരോപിക്കപ്പെടുന്ന കേസ് അന്വേഷിക്കുന്ന വിജിലൻസ് ആൻഡ് ആന്റി കറപ്ഷൻ ബ്യൂറോയുടെ പ്രത്യേക അന്വേഷണ സംഘത്തിന്റെ (എസ്ഐടി) റിപ്പോർട്ട് പരിശോധിച്ച ശേഷമാണ് ജസ്റ്റിസുമാരായ രാജ വിജയരാഘവൻ വി, കെവി ജയകുമാർ എന്നിവരടങ്ങിയ ബെഞ്ച് ഈ നിരീക്ഷണങ്ങൾ നടത്തിയത്.
അഴിമതി നിരോധന നിയമത്തിലെയും ഭാരതീയ ന്യായ സംഹിതയിലെയും പ്രസക്തമായ വ്യവസ്ഥകൾ പ്രകാരം 33 പേർക്കെതിരെ കേസ് രജിസ്റ്റർ ചെയ്തിട്ടുണ്ടെന്ന് വിജിലൻസ് ഉദ്യോഗസ്ഥർ ഉൾപ്പെടുന്ന എസ്ഐടി ബെഞ്ചിനെ അറിയിച്ചു. ക്ഷേത്ര സ്പെഷ്യൽ ഓഫീസർമാരും 30 ഓളം കൗണ്ടർ സ്റ്റാഫും ഇതിൽ ഉൾപ്പെടുന്നു. അന്വേഷണം തുടരാനും 45 ദിവസത്തിനുള്ളിൽ അന്വേഷണം പൂർത്തിയാക്കാനും ബെഞ്ച് എസ്.ഐ.ടിയോട് നിർദ്ദേശിച്ചു.