അമേരിക്കയിലെ വിവിധ സംസ്ഥാനങ്ങളിൽ ആഞ്ഞടിച്ച ശക്തമായ ശൈത്യതരംഗത്തിലും മഞ്ഞുവീഴ്ചയിലും മരിച്ചവരുടെ എണ്ണം 30 ആയി. വൈദ്യുതി ബന്ധം തകരാറിലായതോടെ ദശലക്ഷക്കണക്കിന് ആളുകൾ കൊടും തണുപ്പിൽ വലയുകയാണ്. വടക്കുകിഴക്കൻ സംസ്ഥാനങ്ങളിൽ കനത്ത മഞ്ഞുവീഴ്ച തുടരുമ്പോൾ, തെക്കൻ സംസ്ഥാനങ്ങളിൽ ഐസ് മഴ ജനജീവിതം ദുസ്സഹമാക്കിയിരിക്കുകയാണ്. പലയിടങ്ങളിലും മരങ്ങൾ വീണ് വൈദ്യുതി ലൈനുകൾ തകർന്നതോടെ തിങ്കളാഴ്ച വൈകുന്നേരം വരെ ആറ് ലക്ഷത്തിലധികം വീടുകൾ ഇരുട്ടിലായി. മിസിസിപ്പിയിൽ 1994-ന് ശേഷമുള്ള ഏറ്റവും വലിയ ഐസ് കൊടുങ്കാറ്റാണ് ഉണ്ടായതെന്ന് അധികൃതർ പറഞ്ഞു. ടെന്നസിയിലെ നാഷ്വില്ലിൽ ഒരു ലക്ഷത്തിലധികം ആളുകൾ വൈദ്യുതിയില്ലാതെ വലയുകയാണ്. ഓക്സ്ഫോർഡിലെ മിസിസിപ്പി സർവകലാശാല ഒരാഴ്ചത്തേക്ക് അടച്ചു.
ന്യൂയോർക്ക് സിറ്റിയിൽ അതിശൈത്യം മൂലം കഴിഞ്ഞ വാരാന്ത്യത്തിൽ എട്ട് പേർ മരിച്ചതായും അധികൃതർ സ്ഥിരീകരിച്ചു. ലൂസിയാന, പെൻസിൽവേനിയ, ടെന്നസി, ന്യൂജേഴ്സി എന്നിവിടങ്ങളിലും മരണങ്ങൾ റിപ്പോർട്ട് ചെയ്തിട്ടുണ്ട്. കൻസാസിൽ ബാറിൽ നിന്ന് കോട്ടും ഫോണുമില്ലാതെ ഇറങ്ങിയ യുവതിയെ മഞ്ഞിൽ പുതഞ്ഞ നിലയിൽ കണ്ടെത്തി. വിവിധ സംസ്ഥാനങ്ങളിൽ നിന്നായി ദാരുണമായ വാർത്തകളാണ് പുറത്തുവരുന്നത്. മസാച്യുസെറ്റ്സിലും ഒഹായോയിലും മഞ്ഞുനീക്കം ചെയ്യുന്ന യന്ത്രങ്ങൾക്കിടയിൽപ്പെട്ടാണ് രണ്ട് പേർ മരിച്ചത്. അർക്കൻസാസിലും ടെക്സസിലും സ്ലെഡ്ഡിംഗ് അപകടങ്ങളിൽ കൗമാരക്കാർ കൊല്ലപ്പെട്ടു.
ന്യൂയോർക്കിലെ സെൻട്രൽ പാർക്കിൽ 11 ഇഞ്ച് മഞ്ഞാണ് വീണത്. പിറ്റ്സ്ബെർഗിന് വടക്കുള്ള പ്രദേശങ്ങളിൽ 20 ഇഞ്ചിലധികം മഞ്ഞ് വീഴ്ചയും മൈനസ് 25 ഡിഗ്രി സെൽഷ്യസ് വരെ തണുപ്പും രേഖപ്പെടുത്തി. 2014-ന് ശേഷമുള്ള ഏറ്റവും വലിയ ശൈത്യതരംഗത്തിനാണ് അമേരിക്ക ഇപ്പോൾ സാക്ഷ്യം വഹിക്കുന്നത്. തണുപ്പ് ഇനിയും വർദ്ധിക്കുമെന്നതിനാൽ ജനങ്ങൾ വീടിനുള്ളിൽ തന്നെ കഴിയണമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.
കൊടും തണുപ്പിൽ നിന്ന് രക്ഷപ്പെടാൻ പല കുടുംബങ്ങളും ഹോട്ടലുകളിലേക്ക് താമസം മാറ്റി. വ്യോമഗതാഗതത്തെ കൊടുങ്കാറ്റ് രീതിയിൽ ബാധിച്ചു. തിങ്കളാഴ്ച മാത്രം എണ്ണായിരത്തിലധികം വിമാന സർവീസുകൾ വൈകുകയോ റദ്ദാക്കുകയോ ചെയ്തു. ഞായറാഴ്ച അമേരിക്കയിലെ പകുതിയോളം വിമാന സർവീസുകളും റദ്ദാക്കിയിരുന്നു. കോവിഡ് മഹാമാരിക്ക് ശേഷം ഒരു ദിവസം ഇത്രയധികം വിമാനങ്ങൾ റദ്ദാക്കുന്നത് ഇതാദ്യമാണ്. റോഡുകളിൽ മഞ്ഞ് മൂടിയതോടെ പ്രധാന ഹൈവേകളെല്ലാം അടച്ചുപൂട്ടിയിരിക്കുകയാണ്.