93 വർഷത്തെ ആയുർവേദ ചികിത്സാ പാരമ്പര്യവുമായി സ്വന്തം ബ്രാൻഡിലുള്ള അന്താരാഷ്ട്ര കേന്ദ്രത്തിന് ദുബായിൽ തുടക്കം കുറിച്ചു. ബർ ദുബായിലെ അൽ ഐൻ സെൻ്ററിൻ്റെ രണ്ടാം നിലയിൽ ആണ് ഇന്ത്യക്ക് പുറത്തുള്ള ആദ്യ കേന്ദ്രം ആരംഭിച്ചത്. 1933-ൽ സ്ഥാപിതമായ ധന്വന്തരി വൈദ്യശാലയുടെ ആദ്യ അന്താരാഷ്ട്ര കേന്ദ്രത്തിന്റെ സേവനങ്ങളുമായി ബന്ധപ്പെട്ട് ദുബായിൽ വിളിച്ചുചേർത്ത വാർത്താ സമ്മേളനത്തിൽ സ്ഥാപനത്തിൻ്റെ ആഗോള പദ്ധതികൾ വിശദീകരിച്ചു.
ധന്വന്തരിയുടെ ആഗോള വളർച്ചയുടെ ആദ്യ ചുവടുവെപ്പാണിതെന്ന് ധന്വന്തരി വൈദ്യശാല മാനേജിംഗ് ഡയറക്ടർ ഡോ. സതീഷ് കുമാർ നമ്പൂതിരി പറഞ്ഞു. ‘ധന്വന്തരി ഗ്ലോബൽ’ എന്ന ലക്ഷ്യത്തിലേക്കുള്ള ആദ്യ ചുവടുവെപ്പാണ് ദുബായിലെ ഈ കേന്ദ്രം. ബഹ്റൈൻ, ഖത്തർ, ഒമാൻ, ഫിലിപ്പീൻസ്, ജർമ്മനി, ഓസ്ട്രേലിയ തുടങ്ങിയ രാജ്യങ്ങളിൽ പുതിയ കേന്ദ്രങ്ങൾ ആരംഭിക്കാൻ തയ്യാറെടുക്കുകയാണ്. 2026-ഓടെ ഇവയെല്ലാം പ്രവർത്തനസജ്ജമാകും. ഈ ആഗോള പദ്ധതികൾക്കെല്ലാം മാതൃകയാവുന്നത് ദുബായിലെ ധന്വന്തരി ആയുർവേദിക് മെഡിക്കൽ സെന്ററാണ് എന്നും അദ്ദേഹം പറഞ്ഞു. “അർബുദവും പ്രമേഹവുമാണ് ഇന്ന് മനുഷ്യരാശി ഭയക്കുന്ന രണ്ട് പ്രധാന രോഗങ്ങൾ. ആശുപത്രികളിൽ അർബുദ രോഗികളുടെ എണ്ണം വർധിക്കുന്നതിൽ ദുഃഖമുണ്ടെങ്കിലും, ആയുർവേദ ചികിത്സയിലൂടെ ലഭിക്കുന്ന വിജയകരമായ ഫലങ്ങളിൽ സന്തോഷമുണ്ട്. മരുന്നുകളില്ലാതെ ആരോഗ്യത്തോടെ ജീവിക്കാനും ഇത്തരം രോഗങ്ങളെ പ്രതിരോധിക്കാനും സഹായിക്കുന്ന ഒരു ‘ജീവിതചര്യ’ വികസിപ്പിച്ചിട്ടുണ്ട്. അതുപോലെ, പ്രമേഹത്തെയും അതിൻ്റെ സങ്കീർണ്ണതകളെയും തടയാനും ഫലപ്രദമായി നിയന്ത്രിക്കാനുമുള്ള ആധികാരിക ചികിത്സാരീതികൾ ഇനിമുതൽ യുഎഇയിലും ലഭ്യമാകും,” ഡോ. സതീഷ് കുമാർ കൂട്ടിച്ചേർത്തു.
കേന്ദ്രത്തിലെ നൂതന ചികിത്സകളെക്കുറിച്ച് സംസാരിച്ചു. ജീവിതശൈലീ രോഗങ്ങളെ പൂർണ്ണമായി മാറ്റിയെടുക്കുന്നതിനുള്ള ചികിത്സകൾക്കാണ് തങ്ങൾ ഇവിടെ പ്രാധാന്യം നൽകുന്നത് എന്നും ന്യൂറോപ്പതി നിർണ്ണയിക്കുന്നതിനുള്ള ആധുനിക സംവിധാനങ്ങളും അതിനനുസരിച്ചുള്ള ചികിത്സകളും ഇവിടെയുണ്ടെന്നും നേത്രരോഗങ്ങൾക്കുള്ള തർപ്പണം, ചർമ്മ-കേശ സംരക്ഷണ ചികിത്സകൾ എന്നിവയും ഉടൻ ആരംഭിക്കുമെന്നും മെഡിക്കൽ ഡയറക്ടറും ചീഫ് ഫിസിഷ്യനുമായ ഡോ. സത്യ കെ. പിള്ള പറഞ്ഞു.
ധന്വന്തരി യുഎഇ മാനേജിംഗ് ഡയറക്ടർ മുരളീധരൻ എകരൂൽ ഗൾഫ് മേഖലയിലെ വിപുലീകരണ പദ്ധതികൾ വിശദീകരിച്ചു. “ധന്വന്തരിയുടെ പാരമ്പര്യം ഗൾഫ് മുഴുവൻ എത്തിക്കുകയാണ് ലക്ഷ്യം. ഇതിനായി ഫ്രാഞ്ചൈസി, നേരിട്ടുള്ള മെഡിക്കൽ സെൻ്ററുകൾ, കൂടാതെ റഫറൽ യൂണിറ്റുകളായി കിയോസ്ക് മോഡലുകൾ എന്നിവയും അവതരിപ്പിക്കും. അടുത്ത മൂന്ന് വർഷത്തിനുള്ളിൽ യുഎഇയിൽ 10 നേരിട്ടുള്ള ഔട്ട്ലെറ്റുകൾ തുറക്കാനാണ് പദ്ധതിയിടുന്നത്,” അദ്ദേഹം പറഞ്ഞു.
ബർ ദുബായിൽ വിജയകരമായി നടന്നുകൊണ്ടിരിക്കുന്ന ആയുർ സത്യയെ ധന്വന്തരി ഏറ്റെടുത്തതിൻ്റെ ഭാഗമായി ഉപഭോക്താക്കൾക്കായി പുതിയ പാക്കേജുകൾ അവതരിപ്പിക്കുമെന്ന് മാനേജറും ഫിസിഷ്യനുമായ ഡോ. ജൈസം അബ്ദുള്ള അറിയിച്ചു. സ്ഥിരം ഉപഭോക്താക്കൾക്കായി സിൽവർ, ഗോൾഡ്, ഡയമണ്ട് എന്നിങ്ങനെ ദീർഘകാല ചികിത്സാ പാക്കേജുകൾ ഉടൻ ആരംഭിക്കുമെന്നും അദ്ദേഹം പറഞ്ഞു.