കുന്നംകുളം പോലീസ് സ്റ്റേഷനിലെ കസ്റ്റഡി മര്ദ്ദനത്തില് പ്രതികളായ നാല് പോലീസ് ഉദ്യോഗസ്ഥരെ സസ്പെന്ഡ് ചെയ്യാന് ശുപാര്ശ. തൃശൂര് റേഞ്ച് ഡിഐജി എസ് ഹരിശങ്കറാണ് പോലീസുകാരെ സസ്പെന്ഡ് ചെയ്യാന് ശുപാര്ശ ചെയ്തത്. ഉത്തരമേഖലാ ഐജി രാജ്പാല് മീണയ്ക്ക് ആണ് ശുപാർശ. നിലവില് എടുത്തിട്ടുള്ള അച്ചടക്ക നടപടി പുനഃപരിശോധിക്കണമെന്നും റിപ്പോര്ട്ട് ചെയ്തിട്ടുണ്ട്.
യൂത്ത് കോണ്ഗ്രസ് ചൊവ്വന്നൂര് മണ്ഡലം പ്രസിഡന്റ് വി എസ് സുജിത്തിനെ കുന്നംകുളം പൊലീസ് സ്റ്റേഷനിലിട്ട് അതിക്രൂരമായി മര്ദ്ദിക്കുന്നതിന്റെ സിസിടിവി ദൃശ്യങ്ങള് പുറത്തു വന്നിരുന്നു. കുന്നംകുളം സ്റ്റേഷനിലെ സബ് ഇൻസ്പെക്ടർ നുഹ്മാൻ, സി.പി. ഒ മാരായ ശശിന്ദ്രൻ, സന്ദീപ്, സജീവൻ എന്നിവർ ചേർന്നായിരുന്നു സുജിത്തിനെ മർദ്ദിച്ചത്.
അതേസമയം, കേസ് ഒത്തുതീർപ്പാക്കാൻ പോലീസ് നേരിട്ടും ഇടനിലക്കാർ വഴിയും പണം വാഗ്ദാനം ചെയ്ത് സ്വാധീനിക്കാൻ ശ്രമിച്ചുവെന്ന ആരോപണവുമായി സുജിത്ത് രംഗത്തെത്തി.സുജിത്തിന് ക്രൂരമർദ്ദനമേറ്റ സംഭവത്തിൽ ഇന്നലെ മനുഷ്യാവകാശ കമ്മിഷൻ സ്വമേധയാ കേസെടുത്തിരുന്നു. ഈ കേസില്പ്പെട്ട നാലു പൊലീസുകാരെയും സസ്പെന്ഡ് ചെയ്യാനാണ് ഡിഐജി നിര്ദേശിച്ചിട്ടുള്ളത്.