ന്യൂഡൽഹി: പ്രധാനമന്ത്രി നരേന്ദ്ര മോദി രണ്ട് ദിവസത്തെ ഔദ്യോഗിക സന്ദർശനത്തിനായി ടോക്കിയോയിലെത്തി. ജപ്പാനിലും ചൈനയിലുമാണ് പ്രധാനമന്ത്രി സന്ദർശനം നടത്തുന്നത്. ഇന്ത്യയുടെ ദേശീയ താൽപ്പര്യങ്ങൾ മുന്നോട്ട് കൊണ്ടുപോകുക, ഉഭയകക്ഷി ബന്ധം ശക്തിപ്പെടുത്തുക, പ്രാദേശിക, ആഗോള സഹകരണം പ്രോത്സാഹിപ്പിക്കുക എന്നിവയാണ് ഈ സന്ദർശനത്തിന്റെ ലക്ഷ്യം.
ദ്വിദിന സന്ദർശനത്തിനായി ജപ്പാനിലെത്തിയ മോദിക്ക് ഇന്ത്യൻ സമൂഹം ഊഷ്മള സ്വീകരണം നൽകി. ഗായത്രിമന്ത്രം ഉരുവിട്ടുകൊണ്ടാണ് ജപ്പാൻ പ്രധാനമന്ത്രിയെ വരവേറ്റത്. ടോക്കിയോയിൽ വിമാനമിറങ്ങിയ പ്രധാനമന്ത്രിക്ക് വേണ്ടി കലാകാരന്മാർ ചേർന്ന് നിരവധി സാംസ്കാരിക പരിപാടികൾ സംഘടിപ്പിച്ചു. ദേശീയ പതാക വീശിയും മോദി കീ ജയ് വിളിച്ചും പ്രധാനമന്ത്രിയെ അവർ സ്വീകരിച്ചു. ഇന്ത്യൻ സംസ്കാരം വിളിച്ചോതുന്ന ഗാനാലാപനവും നൃത്താവിഷ്കാരങ്ങളും കോർത്തിണക്കിയ വിരുന്നാണ് ജപ്പാൻ മോദിക്ക് വേണ്ടി ഒരുക്കിയിരുന്നത്. ഇരു രാജ്യങ്ങൾക്കുമിടയിലുള്ള വ്യാപാരം, നിക്ഷേപം, സാങ്കേതിക ബന്ധങ്ങൾ എന്നിവ കൂടുതൽ ആഴത്തിലാക്കുകയെന്ന ലക്ഷ്യത്തോടെ ജാപ്പനീസ്, ഇന്ത്യൻ വ്യവസായ പ്രമുഖരുമായി ബിസിനസ് ലീഡേഴ്സ് ഫോറത്തിലും അദ്ദേഹം പങ്കെടുക്കും.
ഉഭയകക്ഷി ബന്ധങ്ങൾ വർദ്ധിപ്പിക്കുന്നതിന്റെ ഭാഗമായാണ് പ്രധാനമന്ത്രിയുടെ ജപ്പാൻ സന്ദർശനം. ആദ്യ ഘട്ടത്തിൽ ഇന്നും നാളെയും മോദി ജപ്പാൻ സന്ദർശിക്കും. ജാപ്പനീസ് പ്രധാനമന്ത്രി ഷിഗെരു ഇഷിബയുമായി അദ്ദേഹം ഉച്ചകോടി ചർച്ചകൾ നടത്തും. ജപ്പാനും ഇന്ത്യയും തമ്മിലുള്ള സഹകരണം ശക്തിപ്പെടുത്താനുള്ള അവസരമാണ് തന്റെ ഈ സന്ദർശനമെന്ന് പ്രധാനമന്ത്രി എക്സിൽ കുറിച്ചു. കഴിഞ്ഞ 11 വർഷമായി ഇരുരാജ്യങ്ങളും തമ്മിലുള്ള ബന്ധത്തിന് പുരോഗതിയുണ്ടായിട്ടുണ്ടെന്നും സഹകരണത്തിന് പുതിയ ശക്തി പകരാനാണ് തങ്ങളുടെ നീക്കമെന്നും അദ്ദേഹം കൂട്ടിച്ചേർത്തു. ജപ്പാൻ സന്ദർശനം പൂർത്തിയാക്കിയ ശേഷം ഓഗസ്റ്റ് 31-ന് പ്രധാനമന്ത്രി ചൈനയിലേക്ക് തിരിക്കും.