ലോകമെമ്പാടുമുള്ള യുഎസ് കോൺസുലേറ്റുകളോട് പുതിയ വിദ്യാർത്ഥി വിസ അഭിമുഖങ്ങൾ താൽക്കാലികമായി നിർത്താൻ ഡൊണാൾഡ് ട്രംപ് ഭരണകൂടം ഉത്തരവിട്ടിട്ടുണ്ടെന്ന് സ്റ്റേറ്റ് സെക്രട്ടറി മാർക്കോ റൂബിയോ ഒപ്പിട്ട രേഖകളെ ഉദ്ധരിച്ച് പൊളിറ്റിക്കോ റിപ്പോർട്ട് ചെയ്തു. F, M, J വീസ അപേക്ഷകർക്കുള്ള ഇന്റർവ്യൂകൾക്കാണ് നടപടി ബാധകമാകുക. അതേ സമയം നിലവിൽ ഇന്റർവ്യൂ അപ്പോയിൻമെന്റുകൾ ലഭിച്ചവരെ ഇത് ബാധിക്കില്ല. വിദേശ കാര്യ സെക്രട്ടറി മാർക്ക് റൂബിയോ കോൺസുലേറ്റുകൾക്ക് അയച്ച ഉത്തരവിലാണ് ഇത് സംബന്ധിച്ച നിർദേശമുള്ളത്. അമേരിക്കയിൽ പഠിക്കാൻ അപേക്ഷിക്കുന്ന എല്ലാ വിദേശ വിദ്യാർത്ഥികൾക്കും സോഷ്യൽ മീഡിയ പരിശോധന നിർബന്ധമാക്കാനുള്ള വിശാലമായ പദ്ധതിയുടെ ഭാഗമാണ് ഈ നീക്കം. ഈ നീക്കം വിദ്യാർത്ഥി വിസ നടപടികളെ ഗുരുതരമായി തടസ്സപ്പെടുത്തുമെന്നും അന്താരാഷ്ട്ര പ്രവേശനത്തെ വളരെയധികം ആശ്രയിക്കുന്ന യുഎസ് സർവകലാശാലകളെ സാമ്പത്തികമായി ബുദ്ധിമുട്ടിക്കുമെന്നും റിപ്പോർട്ട് മുന്നറിയിപ്പ് നൽകി.
നേരത്തെ, ട്രംപ് ഭരണകൂടം സോഷ്യൽ മീഡിയ സ്ക്രീനിംഗ് നിയമങ്ങൾ കൊണ്ടുവന്നിരുന്നു, പ്രധാനമായും ഗാസയിലെ ഇസ്രായേലിന്റെ നടപടികളോടുള്ള പ്രതിഷേധങ്ങളുമായി ബന്ധപ്പെട്ട വിദ്യാർത്ഥികളെ ലക്ഷ്യം വച്ചായിരുന്നു ഇത്. പുതിയ ഉത്തരവിൽ പുതിയ പരിശോധന എന്തായിരിക്കുമെന്ന് വിശദമായി പറഞ്ഞിട്ടില്ല, എന്നാൽ ഭീകരവാദത്തിനെതിരെയും ജൂതവിരുദ്ധതയെ ചെറുക്കുന്നതിലും ശ്രദ്ധ കേന്ദ്രീകരിച്ചുള്ള എക്സിക്യൂട്ടീവ് ഉത്തരവുകളെ അത് പരാമർശിച്ചു, വരാനിരിക്കുന്ന വിശാലമായ പരിശോധനയുടെ സൂചന നൽകി.
ഇതിനിടെ, കൂട്ടനാടുകടത്തലുകൾക്കിടെയിൽ ഇന്ത്യക്കാരടക്കമുള്ള വിദേശ വിദ്യാര്ത്ഥികൾക്ക് മുന്നറിയിപ്പുമായി ഡോണൾഡ് ട്രംപ് ഭരണകൂടം. ക്ലാസുകൾ ഒഴിവാക്കുകയോ പഠനം പാതിവഴിയിൽ ഉപേക്ഷിക്കുകയോ ചെയ്യുന്ന ഇന്ത്യൻ വിദ്യാർത്ഥികൾക്കും മറ്റ് വിദേശ വിദ്യാർത്ഥികൾക്കും വിസ നഷ്ടപ്പെടാൻ സാധ്യതയുണ്ടെന്നും ഭാവിയിൽ യുഎസ് വിസയ്ക്ക് അപേക്ഷിക്കാൻ കഴിഞ്ഞേക്കില്ലെന്നും അധികൃതര് മുന്നറിയിപ്പ് നൽകി.
2023-24 അധ്യയന വർഷത്തിൽ യുഎസ് കോളേജുകളിലും സർവകലാശാലകളിലും ചേർന്നത് 1.1 ദശലക്ഷത്തിലധികം അന്താരാഷ്ട്ര വിദ്യാർത്ഥികളാണെന്ന് ഇൻസ്റ്റിറ്റ്യൂട്ട് ഓഫ് ഇന്റർനാഷണൽ എഡ്യൂക്കേഷന്റെ ഡാറ്റ വ്യക്തമാക്കുന്നു. നാഷണൽ അസോസിയേഷൻ ഓഫ് ഫോറിൻ സ്റ്റുഡന്റ് അഡ്വൈസറിന്റെ റിപ്പോർട്ട് അനുസരിച്ച്, വിദേശ വിദ്യാർത്ഥികൾ പ്രതിവർഷം 43.8 ബില്യൺ യുഎസ് ഡോളർ യുഎസ് സമ്പദ്വ്യവസ്ഥയിലേക്ക് പമ്പ് ചെയ്യുകയും രാജ്യത്ത് 3,78,000-ത്തിലധികം ജോലികൾക്ക് പിന്തുണ നൽകുകയും ചെയ്യുന്നു.