മാസപ്പടി കേസിൽ എസ്എഫ്ഐഒ കുറ്റപത്രം ഇഡിക്ക് കൈമാറാൻ അനുമതി. എറണാകുളം അഡീ. സെഷൻസ് കോടതിയാണ് കുറ്റപത്രം കൈമാറാനുള്ള അനുമതി നൽകിയത്. ഈ മാസം ആദ്യവാരമാണ് സിഎംആര്എല്-എക്സാലോജിക് കരാറില് മുഖ്യമന്ത്രിയുടെ മകള് വീണാ വിജയനെ പ്രതിചേര്ത്ത് എസ്എഫ്ഐഒ കുറ്റപത്രം സമർപ്പിച്ചത്.
വീണ വിജയന് ഒപ്പം സിഎംആര്എല് എംഡി ശശിധരന് കര്ത്ത, സിഎംആര്എല് ഫിനാന്സ് വിഭാഗം ചീഫ് ജനറല് മാനേജര് സുരേഷ് കുമാര് എന്നിവരും പ്രതികളാണ്. വീണാ വിജയന് ഉള്പ്പടെയുള്ളവര്ക്കെതിരെ പത്ത് വര്ഷം വരെ തടവ് ശിക്ഷ ലഭിക്കാവുന്ന കുറ്റങ്ങളാണ് ചുമത്തിയത്. സേവനം നല്കാതെ വീണാ വിജയന് 2.7 കോടി രൂപ കൈപ്പറ്റിയെന്നാണ് എസ്എഫ്ഐഒയുടെ റിപ്പോർട്ടിൽ പറയുന്നത്.
രാഷ്ട്രീയ നേതാക്കള്ക്ക് സിഎംആര്എല് 182 കോടി രൂപ നല്കി. സിഎംആര്എല് ഈ തുക കള്ളക്കണക്കില് എഴുതി വകമാറ്റി. കര്ത്തയുടെ മരുമകന് ആനന്ദ പണിക്കര്ക്ക് 13 കോടി രൂപ കമ്മിഷന് നല്കി. കോര്പ്പറേറ്റ് സ്ഥാപനത്തെ ഉപയോഗിച്ച് നടത്തിയ അഴിമതിയാണെന്നുമാണ് എസ്എഫ്ഐഒയുടെ കണ്ടെത്തല്. 2024 ജനുവരിയില് അന്വേഷണം ആരംഭിച്ച കേസിലാണ് 14 മാസങ്ങള്ക്കു ശേഷം കുറ്റപത്രം സമര്പ്പിച്ചത്.